চিফ মিনিষ্টরনা, দিপ্যুটি অনীগা লোয়ননা প্রাইম মিনিষ্টর গা উনখ্রে

হৌজিক ন্যু দিল্লিদা লৈরিবা মনিপুরগী চিফ মিনিষ্টর য়ূম্নাম খেমচান্দনা, দিপ্যুটি চিফ মিনিষ্টর অনী – নেমচা কিপগেন অমসুং লোসি দিখোগা লোয়ননা প্রাইম মিনিষ্টর নরেন্দ্র মোদিগা উনখ্রে।
মনিপুরদা হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসী হৌরকপদগী মনিপুরগী চিফ মিনিষ্টর ওইরম্বা নোংথোম্বম বীরেন অমদি মহাক্কি এম এল এ, মিনিষ্টরশিংনা প্রাইম মিনিষ্টর অসী অমুক্তং ওইরবসু উনরগা ৱারী শানজগে হায়দুনা দিল্লিদা খোঙচৎ কয়ারক হন্না পাঙথোক্তুনা হোৎরবসু উনবা ফংদনা লৈরক্লিবনি।হন্দক মনিপুরগী নৌনা চিফ মিনিষ্টর ওইখ্রবা য়ূম্নাম খেমচান্দনা ঈরায় লায়না প্রাইম মিনিষ্টরগা উনদুনা মনিপুরগী মতাঙদা ৱাফম কয়ামরুম ফোঙদোক্তুনা পি এমগী নাকোং য়ৌহনবা ঙমখিবা অসীমক্তি য়াম্না শীঙথানিঙায় ওইরবা খোঙথাং অমনি হায়না লৌবা য়ারি। মসীমক মনিপুরগী মীয়ামগী অপাম্বনি। মনিপুরগী হৌজিক থেংনরিবা শেল-থুমগী খুদোংচাদবা অমদি চাওখৎ -খোঙথাঙদা প্রাইম মিনিষ্টরনা মতেঙ পাংশিনবিদুনা খূমাঙ য়াঙশীলহনবিয়ু হায়বা ৱাফমশিং চিফ মিনিষ্টর অমদি দিপ্যুটি চিফ মিনিষ্টর অনীনা পূন্না তকশীনমিন্নখি।
প্রাইম মিনিষ্টরনসু মনিপুরগীদমক অখাকপা অমত্তা থমদনা পাংবা য়াবা মতেং পাংগনি হায়না ফোঙদোরকখি হায়রি। মথঙদা চিফ মিনিষ্টর খেমচান্দগী কাঙবূ অদূনা য়ুনিয়ন এগ্ৰিকলচর এন্দ রুরেল দিভেলপমেন্ট মিনিষ্টর শিবরাজ সিংহ চৌহানগা উনখি। য়ুনিয়ন মিনিষ্টর অসীনা মনিপুরদা হৌজিক অৱাবা মায়োক্নদুনা লৈরিবা আই দি পিশিংগী য়ূম ৫০০০ নৌনা শাননবা পি এম এ ৱাই গ্ৰামিনগী মখাদা অয়াবা পীরকখি।
চিফ মিনিষ্টরগী কাঙবূ অদূনা য়ুনিয়ন মিনিষ্টর নিতিন গৎকারিগসু মখা তানা উনখি অমসুং ৱাফম কয়া ফোঙদোকখি হায়রি।