চিফ মিনিষ্টরনা ভুংজাগিন ভাল্টেগা ইম্ফাল এয়রপোর্টতা পূকমেন-পাউমেন্নখ্রে

ফের্জোল দিষ্ট্রিক্টকি মনূঙ চন্না লৈবা থানলোন কেন্দ্রগী এম এল এ ভুংজাগিন বাল্টে, হন্দক মশাগী হকচাং কা হেন্না নুঙাইরক্তবদগী মখাতানা লায়েং চত্থরুনবগীদমক ঙরাং ইম্ফালগী বির টিকেন্দ্রজিৎ ইন্টর্নেস্নেল এয়রপোর্টতগী দিল্লিগীদমক ইম্ফাল থাদোকখ্রে।
এম এল এ অসিনা হায়জরকখ্রবা মতূঙদা চিফ মিনিষ্টর খেমচান্দ না মহাকপু মতেঙ পাংননবা অখন্নবা মীৎয়েং চঙদুনা থাঙ্গ কেন্দ্রগী এম এল এ তোংব্রম রোবিন্দ্রো অমসুং কুম্বি কেন্দ্রগী এম এল এ সনসম প্রেমচন্দ্র অনিবু বিষ্ণুপুর দিষ্ট্রিক্টকি ফৌগাকচাউ ঈখায়দা ঙাইদুনা লৈহল্লবা মতূঙ, মফম অদুদগী ইম্ফালগী এয়রপোর্ট তম্না এম এল এ অনী অসীগা লোয়ননা এম্বুলেন্স অমদা ভুংজাগিন বাল্টেবু পুরকখি। এয়র এম্বুলেন্স তা পুখিদ্রিঙৈ মাঙওইননা চিফ মিনিষ্টরনা বাল্টেগা এম্বুলেন্স মনূঙদা ফম্মিন্নদুনা কূপ্না ৱারী শান্নখি, পূকমেন-পাউমেন্নখি লোয়ননা মহাককি হকচাং অথূবদা মপূঙ ফানা ফগৎলক্তুনা ইম্ফালদা অমূক হল্লকপা ওইরসনু, মহাক্না হল্লকপা ঙাইদুনা লৈরমখিগনি হায়বা ৱাফম চিফ মিনিষ্টরনা ভুংজাগিনগী মফমদা নুংশিবা ৱাহৈ অমসুং মীৎয়েংগা লোয়ননা ফোঙদোকখি।
হৌখিবা কুমশিং ২০২৩ গী মে অহূমদগী হৌরকখিবা মৈতৈ অমসুং কুকি কাঙলূপকি মরক্তা লৈরিবা হীঙশাগী ঈরাং অসিগী মনূঙচন্না শকখঙদবশিংনা এম এল এ অসিবু রিমস রোদতা তমথীনা ফূখিবা থৌদোক অমদা শোক্তুনা মতম শাংনা মনিপুরগী ৱাংমদা লায়েং চত্থদুনা লাকখ্রবা মতূঙদা হকচাংগী ফীভম ফগৎলক্তুনা মশাগী য়ূমদা হল্লক্তুনা লৈখিবনি। অদূম ওইনমক হন্দক মশা য়াম্না নুঙাইরক্তবদগী মপান্দা লায়েংলুননবা ঙরাং ইম্ফালগী বির টিকেন্দ্রজিৎ ইন্টর্নেস্নেল এয়রপোর্টতগী দিল্লিগীদমক ইম্ফাল থাদোকখিবনি।