হৌখিবা মার্চ ২৮ দা সেন্ট্রেল ম্যান্মারদা মেগনিচ্যুদ ৭.৭ য়ৌনা নীক্তুনা অকনবা মওংদা হাখিবা য়ুহারনা মরম ওইদুনা খুন্তাক- লান্সিবগী ফিভম মায়োক্নরগা লৈরিবা ম্যান্মারদা হৌখিবা নোংমাইজিং নুমীৎকি অঙনবা অয়ুক্তসু রিচতর স্কেলদা মেগনিচ্যুদ ৫.৫ য়ৌনা নীক্তুনা অকনবা য়ুহার হাখিবদগী মীয়াম খম থেংনা মিপাইনখ্রে। য়ুহার অদূগী ইপিসেন্টরনা মন্দলে অমসুং নাইপিটাউ সহর অনীগী মরক্তা ওইখি হায়না য়ু এস জিওলোজিকেল সর্ভে রিপোর্ট অমদা ফোঙদোকখি।
মন্দলে হায়রিবা ম্যান্মারগী অনিশুবা খ্বায়দগী চাউরিবা সহর অসীদা মার্চ ২৮ দা হাখিবা য়ুহার অদুনা কা হেন্না অমাঙ- অতা থোকহনখিবগা লোয়ননা মীওই লীশিং কয়ামরুম শিহনখিবনি। হৌজিকসু মী কনবা,অশিবা মীওইশিং অতেক- অকাই মরক্তগী লৌথোকপগী থবকশিং লেপ্পা লৈতনা চত্থরগা লৈরিবনি।রেসক্যু ৱার্করশিংনা রিলিফ অমদি রেসক্যুগা মরী লৈনবা থবক থৌরমশিং পাঙথোক্তুনা লৈরিবনি।
নোংমাইজিং নুমীৎকি অঙনবা অয়ুক্তা নৌনা হারকখিবা য়ুহার অদুনা কয়া য়াম্না অমাঙ- অতা থোকহনখ্রবগে অমসুং মীওইশিং শিহনবা য়াওরব্রা হায়বগী মতাঙদদি হৌজিকমক্কি ওইনা পাউ ফংবা লৈত্রি হায়রি।