ইন্দো-ম্যান্মার বোর্দরগী মনিপুর পরীংদা খুন্দারিবা নাগা অমসুং কুকি-জো কাঙলূপকি মীয়াম্না হৌজিক ইন্দো-ম্যান্মার বোর্দরদা ইন্দিয়া লৈঙাক্না পায়খৎলিবা বোর্দর ফেন্সিং গী থবক অসী কৈদৌনূংদা য়াবা ঙম্লোই হায়বা ৱাফম ফোঙদোক্তুনা য়ানীঙদবগী খোঙজঙ চঙশীন্দুনা লাক্লি। ঙরাংসু খোঙজঙ অসীগী শরুক অমা ওইনা চান্দেল দিষ্ট্রিক্টকি মনূঙচন্না লৈরিবা ন্যু সোমটাল এরিয়াদা মশীঙ য়াম্লবা নাগা ফূরুপকি নূপা-নূপীশিংনা থোক্লক্তুনা বোর্দর ফেন্সিংগী থবক থৌরমশিং চত্থবা য়ারোই হায়দুনা অকনবা খোল্লাউ কয়াগা লোয়ননা রেল্লি চত্তুনা খোঙজঙ চঙশীনখ্রে।
ইন্দিয়ানা মনীঙ-মখা তমদ্রিঙৈ মমাঙদগী ঈমূং- মনূঙ ওইনা লৈমিন্নরক্লবা নাগাশিং তোখাইনা লৈনহন্ননবা থবক পায়খৎলক্লিবসি নাগাশিংনা কৈদৌনূংদা য়াবা ঙম্লোই হায়বা ৱাফম ফোঙদোক্তুনা বোর্দর ফেন্সিংগী থবক থৌরমশিং খূদক্তা লেপকদবনি, করিগুম্বা ইন্দিয়া লৈঙাক্না পায়খৎলিবা বোর্দর ফেন্সিং গী থবক থৌরমশিং অসী লেপত্রবদি হেন্না কনবা, হীঙশা য়াওবা ঈহৌশিং নাগা কম্যুনিটিনা চঙশীল্লকপা য়াই হায়বা অকনবা ৱার্নিং তৌখি।
নাগা সিভিল সিভিল সোসাইটি ওরগনাইজেসন কয়ানা শীন্দুনা পাঙথোকখিবা মীয়ামগী রেল্লি অদূ সেন্টর লৈঙাক্না পায়খৎলিবা বোর্দর ফেন্সিং অসী লেপত্রিফাওবা মখা তানা চত্থখিগনি হায়রি।