হৌজিক চত্থরিবা পারলিয়ামেন্ট কি নোংজু মীফম অসীদা ঙরাং মনিপুরদা থম্লিবা প্রসিদেন্ট রুল অসী মখাতানা থা তরুক শাংদোক্ননবা লোক সভানা ৱারেপ লৌখ্রে। রাজ্য সভাদনা ঙসী পুথোক্তুনা খন্নরবা মতূঙ হাওস অসীনসু পাস তৌরক্লগনি হায়বগী চপচাবা থাজবা লৈখ্রে। ঙসীদি ওইরক্লিবা মওং-মতৌশিং অসী য়েংলুরগা ঐখোয় মনিপুরিশিংগী ইজ্জৎ অমসুং ঈকায়খুম্নবা পূম্নমক মাঙখ্রে, হিংলুবগী ৱাহন্থোক অমত্তা লৈত্রে অদুগা মীয়ামগী মীহূৎনি হায়দুনা তলব খরগা এম এল এগী লোকেল এরিয়া দেভলপমেন্ট ফন্দ খরা ফংলি হায়দুনা পেন্থোক্তুনা কাচিন্দা তূমীন্না ফমদুনা কয়াম কুইনা লৈখিগদগে হায়বদু বি জে পিগী এম এল এ শিংনা খন্থবা মতমদু য়ৌদ্রিবরা, বি জে পিগী এম এল এ শিংনা হৌজিক ওইরক্লিবা থাক অসীদা কৈদৌবা তারিবগে হায়না ৱাঙ্গোই কেন্দ্রগী এম এল এ খূরায়জম লোকেন্না য়াম্না তকশী শোন্দুনা, পেন্দবগী ৱাহং খরা বি জে পিগী এম এল এ শিংদা হংলক্লি।
মনিপুর ষ্টেটকি লেজিসলেটিব এসেমব্লিদা হৌজিক এন পি পিগী এম এল এ ৬,নাগা পিপলস ফ্রন্টকি এম এল এ ৬ অমসুং কংগ্রেস পার্টীগী এম এল এ ৫ অসিখক্না লৈঙাক শেম্বা ঙমগদবা নত্তে। মনিপুরগী মীয়াম্না য়াম্না অচেৎপা থাজবা থমদুনা ভোৎ পীদুনা লৈঙাক শেমলকখিবা, সাসন পায়দুনা লাকখ্রবা, এম এল এ মশীঙসু লৈঙাক শেম্নবগীদমক মতীক চানা লৈজরিবা বি জে পিগী এম এল এ শিংনা অমত্তা ওইনা কোক চূঙশীন্নদুনা লৈঙাক শেম্বা ঙমহৌদবদগী মনিপুরদা পি আর শাংদোরকখিবনি।
মসীগী তেকচাক পূম্নমক বি জে পিনা পুগদবনি হায়খি। রুলিং বিজেপিনা মশা- মশাখক্কি কান্নবা য়েংবদগী, অমত্তা ওইনা পূন্সিন্নদুনা য়েৎননিঙায় লৈত্রবা লুচিংবা অমা খনবা ঙমহৌদবনা মনিপুরদা পি আর শাংদোকহনখিবনি হায়খি। ফেসবুক্তা হেরো শাদুনা ৱাজাও ঙাঙবনা ঈরমদমগী ইজ্জৎ কনবা ঙম্লোই হায়বসি বি জে পিগী এম এল এ শিংনা খঙজীনবা কান্নগনি হায়না মহাক্না ফোঙদোকখি। ঙসীদি মীয়ামগী মীহুৎনি, এম এল এনি হায়না লৈজরিবশিং অসী ১৩৪ শুবা দ্যুরান্দ কপকি মেটচ ইম্ফালদা পাঙথোক্লিবা অসীফাওবা শরুক য়াহনবিদ্রে, ইনভাইট তৌবিরক্ট্রে, ঐখোয়গী ইজ্জৎ-সন্মান পূম্নমক বি জে পিনা লৈখা তাহল্লে হায়না মহাক্না পেন্দবা ফোঙদোকখি।