ওল মনিপুর য়ুনাইটেদ ক্লবস ওরগনাইজেসন ( অমুকো) লিংখৎখিবা চহী ৩২ শুরকপগী ফাওন্দেসন দে নীংশিং থৌরম অমা ঙরাং ইম্ফাল নোংচুপ পানাগী মনূঙচন্না লৈরিবা ক্বাকৈথেল অখাম লৈকায় কম্যুনিটি হোলদা চীঙ লেম্না পাঙথোকখ্রে। ওরগনাইজেসন অসীগী প্রসিদেন্ট ফৈরোইজম নন্দো লুৱাংনা লূপ অসিগী ফিরাল চিংখত্তুনা হৌদোকখিবা থৌরম অদূগী মতূঙদা ওরগনাইজেসন অসীগী থৌ পুরম্বা, লৈখিদ্রবা থৌমীশিংগী ফোতোশিংদা লৈ কত্তুনা মীয়াম্না ঈকায়খুম্নবা ঊৎখি।
লৈখিদ্রবা থৌনা ফরবা ঈপা-ঈপূশিংনা মনিপুরগী অপূনবা শক্তম কায়হন্দনবা, ইন্টিগরিটি ঙাক্তুনা লাকখি। মনিপুরগী অপূনবা শক্তম মখাতানা ঙাক্তুনা থম্নবগীদমক অমুকো লিংখৎলম্লবা মতূঙদা মচা-মশূ ওইরিবা ঙসীগী মীরোলদা শিন্নবিরম্বনি। ঐখোয়না ইরমদম অসীগী ইন্টিগরিটি ঙাক্ননবা হোৎনরবসু ইন্দিয়া লৈঙাক্না মওং কয়াগী শরৌ তৌদুনা অমসুং পোলিটিকেলগী ওইবা লাং থাক্তুনা মনিপুরবু মচেৎ তানা থুগাইনবা হোৎনরক্লি। মসী কৈদৌনুংদা য়াবা ঙম্লোই হায়না থৌরম অদূদা নন্দো লুৱাংনা ফোঙদোকখি।
ফাউন্দেসন দে থৌরম অদুদা পোইরৈ লৈমরোল অপূনবা মৈরা পায়বীগী প্রসিদেন্ট সোরাইসম মেমচা, ফেদরেসন ওফ হাওমীগী জেনেরেল সেক্রেটরি য়াজিং ভি সিসি, ওল মনিপুর ৱিমেন ভলন্টরি এসোসিয়েসনগী প্রসিদেন্ট য়ূমখায়বম কুঞ্জরানি, ওল মনিপুর মৈতৈ-পাঙল ক্লবস ওরগনাইজেসন অমসুং অতৈ ওরগনাইজেসন কয়াগী লুচিংবশিংসু শরুক য়াখি।