ওল মনিপুর মৈতৈ- পাঙল দেভলপমেন্ট ওরগনাইজেসন ( অম্মদো) গী মরিরকশুবা ৱাশক লৌবগী থৌরম ঙরাং লিলোং হাওরৈবী কোল্লেজগী ওদিটোরিয়মদা পাঙথোকখ্রে। লমদম অসীগী তোঙান তোঙানবা মশক নাইরবা সিভিল সোসাইটি ওরগনাইজেসন কয়াগী লুচিংবশিং প্রেসিদিয়ম মেম্বর ওইনা শরুক য়াদুনা পাঙথোকখিবা ৱাশক লৌবগী থৌরম অদূদা লাক্কদৌরিবা চহী অহুমগী থৌ পুগদবা এগজিক্যুটিব মেম্বরশিং ৱাশকখি। অম্মদোগী প্রসিদেন্ট পুসম সহিদ অহম্মদনা থৌরমদুদা ফোঙদোকখিবা মতূং ইন্না, লমদম অসীগী তুংগী য়ূম্বীরেল ওইহৌগদৌরিবা ঙসীগী নহারোলশিংনা নিসাগী ঈপাক্তা তাউদুনা লৈথোকপগী মহূত্তা মহৈ-মশিন তমদুনা মতীক চাবা, অফবা মীওই অমমম ওইননবা হোৎনসি।
নিষা মরূ ফংনা মূত্থত্তুনা, নিষা য়াওদ্রবা মনিপুর অমা পুরক্নবা পান্দমদা অম্মদোনা ঙসীফাওবা অচেৎপা ফিরেপকা লোয়ননা থবক পায়খত্তুনা লাক্লি। মীয়াম্নসু ওরগনাইজেসন অসীদা মতেং পাংবিদুনা অফবা, অওনবা মনিপুরি খুনাই অমা ওইহন্ননবা হোৎনমিন্ন সি হায়খি। লূপ অসীনা লৈরিবমখৈ ঈরমদম মনিপুর মীয়ামগী য়াইফনবা, লমদম অসীগী য়ুনিটি অমসুং ইন্টিগ্ৰিটি ঙাক্তুনা থম্নবা থবক থৌরমশিংদা মাঙজীল থানা চোংথোক্তুনা থবক তৌগনি হায়নসু সহিদনা ফোঙদোকখি।
ওরগনাইজেসন অসীগী প্রসিদেন্ট পুসম সহিদ অহম্মদ, ভাইস-প্রসিদেন্ট-১ অব্বাস খান চেসাবম, ভাইস-প্রসিদেন্ট-২ ময়াংময়ুম ফিরোজ, ভাইস-প্রসিদেন্ট-৩ খুল্লাকপম রাজাউ, জেনরেল সেক্রেটরি হৈবোকময়ূম মুজাফর, ফাইনান্স সেক্রেটরি শঙ্গোমশুম্ফম ইকবালনচিংবা থৌমীশিং ঙরাং ৱাশক লৌখি।