ওল মনিপুর ইথনিকেল সোসিও -কলচরেল ওর্গানাইজেসন (অমেস্কো) না চহী খূদীঙগী লেপ্তনা পাঙথোক্তুনা লাক্লিবা শজীবূ খূদোল তম্বগী থৌরমগা লোয়ননা ঈগী খোঙ্গুল লীবগী থৌরম ঙরাংসু মখা তানা পাঙথোকখ্রে।
হন্দককি চহী অসীগী অহানবা ওইনা ইম্ফালগী নাগারাম তাঙ্খুল কম্যুনিটি হোলদা হৌখিবা মার্চ ২১ দা শজীবূ খূদোল তম্বগী অমদি ঈগী খোঙ্গুল লীবগী থৌরম পাঙথোক্তুনা তাঙ্খুল কাঙলূপকি মবূঙ মৌপ্বা ওইবশিংদা মৈতৈ ফূরূপকি মচল-মচে ওইবি নিঙোলশিংনা অনৌবা চহীগী খূদোল তম্বগা লোয়ননা ঈগী খোঙ্গুল লীবগী থৌরম পাঙথোকখ্রবা মতূঙদা ঙরাং অনীরকশুবা ওইনা লৈশাংখোং কবুই পোপ্যুলর ক্লব, ৱাঙ্গোইগা খূৎশম্নদুনা কবুই খুল অসীগী কম্যুনিটি হোলদা খূদোল তম্বা অমসুং ঈগী খোঙ্গুল লীবগী থৌরম অমা পাঙথোকখ্রে।
থৌরমদুদা মৈতৈ -পাঙল অমদি লৈশাংখোং কবুই খুনগী অহলশিং শরূক য়াখি।মৈতৈ-পাঙলগী মবূঙ- মৌপ্বা ওইবশিংদসু মৈতৈ ফূরূপকি নিঙোলশিংনা অনৌবা চহীগী খূদোল তম্বগা লোয়ননা ঈগী খোঙ্গুল লীবা থৌরম পাঙথোকখি।থৌরম অসী অমেস্কোনা হৌখিবা কুমশিং ২০০০ দগী হৌনা লেপ্তনা চত্থদূনা লাক্লিবনি হায়না ওর্গানাইজেসন অসীগী প্রসিদেন্ট চীঙলেম্বা ৱাহেংবমনা ফোঙদোকখি।