লম্বী-থোং শেম্বা লোইশিনবিরো, পোং লম্বীদা এম্বুলেন্স চৎপা য়াবা থোং শাবিয়ু: তোম্বা

মনিপুরদা কংগ্ৰেস লৈঙাক্কি মতমদা জেনিমস হোস্পিটাল অসী গেট অমদগী হেন্না ফাৎলমদে। হোস্পিটাল হায়বসিদি মায়কৈ পূম্নমক্তগী লাকপা অনা-অয়েক পুরকপা গারিশিং অথু-অকাইগীদমক চঙথোক-চঙশীন তৌবা য়াননবা গেট মশীঙ য়াম্না ফাৎনরিবনি।কংগ্ৰেস লৈঙাক্না মদূ উবা ঙম্লমদ্রে। পোং লম্বীসু থিংজিন্দুনা হৌদোং ফাওবা লীৎপা য়াহল্লমদবনি অদূবু বি জে পিগী লৈঙাক লাক্লবা মতমদা খূরায়গী এম এল এ সুসিন্দ্রোনা মীয়ামগীদমক হোৎনবিদুনা পোং লম্বী ফাৎপীদুনা মীয়াম চত্থোক-চৎশীন তৌবা য়ানবা থোং মচা অমসু শাবিরম্মি।

এম এল এ অসীনা শেম্বীরম্বা পোং লম্বীগী মখা থংবা শরুক অসীদা দ্রেন ওইনবা থম্বীরম্বা লমখৈ অসী মনাক নক্না লৈরিবা মীওইশিংনা লম খোপচীল্লক্তুনা দুকান, হোটেল কয়া শাজিল্লক্তুনা দ্রেনগী মফম লৈশিল্লক্ট্রে। মসীগী মতাঙদা ফাউন্দেসন ফোর রুরেল অর্বান দিবেলপমেন্ত কি প্রসিদেন্ট এল তোম্বনা মমাঙদসু কয়ারক হন্না লৈঙাক্কি মীৎয়েং চিংশিন্দুনা লম খোপচীল্লিবা অসী তকথোকপিননবা মেদিয়াগী খূত্থাংদা হায়জখ্রবসু লৈঙাক অসীনা তুমিন্না লৈশিল্লি হায়না তোম্বনা পেন্দবা ফোঙদোরক্লি।

এম এল এ লৈশাংথেম সুসিন্দ্রোনা থোং অমা শাবিরম্লিবা অসী আর সি সিগী ওইনা অপগ্ৰেদ তৌবিদুনা জেনিমস হোস্পিটাল ফাওবা এম্বুলেন্স চঙলকপা য়াননবা থৌরাং লৌখৎপিয়ু, পোং লম্বীগী মখারোম থংবদা লম খোপচীল্লক্লিবা ময়ামসি তকথোকপিয়ু, পোরোম্পাৎ কৈথেলদা চত্থরক্লিবা আইন কায়বা থৌওংশিং অসী য়েংশিনবিদুনা চুমথোকপিয়ু, লম্বী শেম্লিবনি হায়দুনা থুগাইয়বা য়ৈখায়বা তৌরগা মতম শাংনা লোইশিন্দনা লৈরিবসি লৈঙাক অসীনা অথুবা মতমদা লোইশিনবিয়ু হায়রক্লি। তুরেলশিং অসিসু তেংথোকপিদুনা ঈশীংগী ঈচেলদা অথিংবা লৈহন্দনবা লৈতনবা থৌরাং তৌবিয়ু হায়দুনা তোম্বনা বি জে পি লৈঙাক অসীগী মীৎয়েং চিংশিল্লক্লি।