স্পোর্টস অথোরিটি ওফ ইন্দিয়া (সাই) গী মীৎয়েং মখাদা ১২০ শুবা বট্টালিয়ন সি আর পি এফনা শীন্দুনা ঙরাং ইম্ফাল ৱেষ্ট দিষ্ট্রিক্টকি মনূঙ চন্না লৈবা মাক্লং ফূটবোল গ্ৰাউন্দ দা লোকেল শান্নরোয়শিংনা শরূক য়াদুনা ফুটবোল টুর্নামেন্ট অমা হৌদোকখ্রে।
টুর্নামেন্ট হৌদোকখিবা থৌরম অদুদা লমশাং কেন্দ্রগী এম এল এ সোরোকখাইবম রাজেন্না অথোয়বা মীথুংলেন ওইনা শরুক য়াখি। টুর্নামেন্ট অসীদা টিম ১২ না শরুক য়ারি। পুল অনী থোক্না খায়দোক্লগা পুল অমমমদা টিম ৬/৬ লৈগনি হায়রি। টুর্নামেন্ট অসীগী মকোক মথঙ তারবশিংদা মথঙশীৎনা কেস প্রাইজ লূপা ১০,০০০, লূপা ৬,০০০ অমসুং লূপা ৫,০০০ গা লোয়ননা সার্টিফিকেট অমসুং মেদলশিং পীগনি হায়রি।
নহারোলশিং স্পোর্টস তা মায় ওন্সীলহন্দুনা কাঙলূপশিংগী মরক্তা নুংশি-চাননা লৈননবা, সোসিয়েল হার্মোনি অমদি কলচর প্রমোট তৌনবা পান্দমদা টুর্নামেন্ট অসী পাঙথোকপনি হায়রি। ঙরাং হৌদোকপা নুমিৎতা শঙাইথেল এ অমসুং শঙাইথেল বি অনীনা শান্নখি। ১২০ শুবা সি আর পি এফ বট্টালিয়নগী কম্মান্দেন্ট রাজিব লোচান্দ, এসিষ্টেন্ট কম্মান্দেন্ট এস দিনেসচন্দ্র, বট্টালিয়ন অসীগী অতৈ মকোকথোংবা ওফিসিয়েল কয়াগা লোয়ননা লোকেল শান্নরোয়শিংনা টুর্নামেন্ট হৌদোকখিবা থৌরম অদুদা শরুক য়াখি।