লিলোং হাওরৈবি কোল্লেজগী মহৈরোয়শিংদা ইন্টিগ্ৰেটেদ টিচর ইদুকেসন প্রোগ্ৰামগী মখাদা মহৈ তম্নবগী খুদোংচাবা ফংহন্দ্রবদি নেস্নেল হায়ৱে ১০২ থিংবা য়াওনা মখল-মখা কয়াগী খোঙজঙশিং চঙশীল্লগনি হায়না কোল্লেজ অসীগী ষ্টুদেন্টস য়ুনিয়ন্না ফোঙদোরক্লি। নেস্নেল হায়ৱে ১০২ থিংবগী খোঙজঙ অসী পূঙ ৪৮ গী ওইনা চঙশীনগদবনি হায়রি। মনিপুর য়ুনিভর্সিটিনা হীরম অসীগী মতাঙদা সেপ্তেম্বর তরূক ফাওবগী মনূঙদা ওর্দিনান্স অমা থোক্কদবনি।
মদূ নত্রবদি কোল্লেজ অসীগী মহৈরোয়শিংনা ৱাখল্লোন মান্নবা মহৈরোয় লূপশিং অমসুং গার্জিয়ানশিংগা লোয়ননা চঙশীল্লকপা খোঙজঙশিংদা লমদম অসীদা লৈরিবা লূপশিং অমসুং মহৈরোয়শিংনা মতেঙ পাংবিয়ু হায়না লিলোং হাওরৈবি কোল্লেজ ষ্টুদেন্টস য়ুনিয়নগী জেনরেল সেক্রেটরি এস এম ফরিদ খান্না পাউমীশিংদা ফোঙদোকখি। ইন্টিগ্ৰেটেদ টিচর ইদুকেসন প্রোগ্ৰামগী মখাদা কোল্লেজ অসীগী মহৈরোয়শিং মহৈ তম্বা ফংহন্দবা অসীগা মরী লৈননা কোল্লেজ অসী সটদাওন তৌদুনা লাকপা থা অমা হেল্লক্লে।
মসীগী মতাঙদা ঙরাং মনিপুরগী গভর্নরগা হকথেঙননা উনদুনা ৱাফমশিং খন্নরুরে হায়না ফোঙদোক্লদুনা, গভর্নরনসু পোজিটিব ওইবা রেসপোন্স পীবিরকখি হায়খি। সেপ্তেম্বর থা অসীগী তরুক ফাওবদা ওর্দিনান্স পুথোক্ট্রবদি মহৈরোয়শিংনা চঙশীল্লকপা খোঙজঙশিংগী অফা-ফত্তগী তেকচাট পূম্নমক মনিপুর য়ুনিভর্সিটিগী ভাইস চাঞ্চেল্লর অমসুং মনিপুর লৈঙাক্না পুগদবনি হায়বা ৱাফম ফরিদ খান্না মখাতানা ফোঙদোকখি।