এন আর সিগী দিমান্দ শোয়দনা মায় পাক্কনি হায়বগী থাজবা লৈ: চিফ মিনিষ্টর

মনিপুরগী মীয়াম্না, মরূওইনা কেম্পেইন ফোর জষ্ট এন্দ ফ্যের দিলিমিটেসন (জে এফ দি) না দিমান্দ তৌরিবা ৱাফম হায়বদি “নো এন আর সি, নো সেন্সস” হায়বসি য়াম্না মরম চারবা, কন্সটিট্যুসন্না য়াবা দিমান্দ অমনি। মীয়াম্না চঙশীন্দুনা লাক্লিবা খোঙজঙ অসিদা মনিপুর লৈঙাক্নসু থৱায় হকচাং য়াওনা, মপূঙ ফানা শৌগৎলি হায়বা ৱাফম চিফ মিনিষ্টর য়ূম্নাম খেমচান্দনা ফোঙদোকখ্রে।
স্কুল অমসুং কোল্লেজ ১০ গী মহৈরোয়শিংগা ঙরাং চিফ মিনিষ্টর বাংলোদা উনখিবা অমদা ৱাফম অসী চিফ মিনিষ্টরনা ফোঙদোকখিবনি। রেল্লি অমগা লোয়ননা লাকখিবা মহৈরোয় কাঙবূ অদুনা চিফ মিনিষ্টরগা উনখিবা অদূদা, মনিপুরদা এন আর সি অপদেট মপূঙফানা তৌদুনা মীতোপ-মীয়ানশিং ময়েক শেংনা খন্দোক্তুনা তকথোকখ্রবা মতূঙদা সেন্সসকি থবক লৌখৎপিয়ু হায়না চিফ মিনিষ্টরদা তকশীনখি। মখোয়না পুখৎলকখিবা ৱাফমশিংদু মুন্না তারবা মতূঙদা, হৌজিকমক্কি ওইনা সেল্ফ-ইন্যুমরেসনগী থবক পায়খৎনবা শেমগৎখিবা পোর্টেল অদূ থিংজিন্দুনা থম্লি, এন আর সি মপূঙফানা, ময়েক শেংনা অপদেট তৌরবা মতূঙদা সেন্সসকি থবক পায়খৎনবা হোৎনবা হায়বসি মহাক্কি লৈঙাক অসীগীসু অপাম্বনি হায়না চিফ মিনিষ্টরনা ফোঙদোরকখি হায়রি।
লাক্লিবা নিংথৌকাবা নুমিৎ ফাওবগী মনূঙদা হীরম অসীগী মতাঙদা সেন্টরনা পোজিটিব রেস্পোন্স অমা পীরক্কনি হায়বগীসু থাজবা লৈরি হায়না চিফ মিনিষ্টরনা মহৈরোয়শিং অদূদা ফোঙদোরকখি। লাক্লিবা সেপ্তেম্বর অনীদগী হৌগদৌরিবা ষ্টেট এসেমব্লীগী মীফমদসু হীরম অসীগী মতাঙদা পুখত্তুনা খন্নরগনি হায়না সি এম্না ফোঙদোরকখি হায়রি।