ষ্টেট অসীদা হন্দক মৈ ঙাইহাক লৈতনা মূৎপগী ফীভম অমা মায়োক্নরিবসি কালেন্থা মতমসিদা নোংমদা মীয়ামগী দরকার ওইরিবা মৈগী চাং অদূ য়ৌনা ফংবা ঙমদবগীনি। লাউথোকপা নত্রগা লাউথোক্তবা লোদ সেদ্দিংগী প্রোগ্ৰাম করিসু লৈতে হায়না এম এস পি দি সি এলগী মেনেজিং দিরেক্টর এম রবিনা ফোঙদোকখ্রে।
ঙরাং দি আই পি আরগী ওদিটোরিয়মদা পাঙথোকপা মিট দি প্রেস থৌরমদা শরুক য়ারদুনা ৱাফম অসি মহাক্না ফোঙদোকখিবনি। রবিনা হায়, ষ্টেট অসিদা থা অমা চূপ্না চল্লাইনবা মপান্দগী মৈ লৈবদা লূপা ক্রোর ৬৩ দগী ৬৮ ফাওবা শেল চাদীং তৌরি। মৈদগী কারক্লিবা রেভিন্যুগী শেনফম্না থা অমদা শুপ্নগী লূপা ক্রোর ৩৭ তগী ৩৯ লোমদনি। মতৌ অসূম্না থা খূদীংগী দিফিসিট তারিবা শেনফম অসী লূপা ক্রোর ৩০ রোম ওইরি হায়খি।
মহাক্না হায়, ষ্টেট অসিদা অপূনবা ইলেক্ট্রিসিটি কঞ্জুমর মশীঙগী চাদা ৯৫ রোমদি প্রিপেদ মিটর শীজীন্নৈ। হান্নদগী শীজীন্নরিবা প্রিপেদ মিটর মখল অসীগী মহূত্তা স্মার্ট মিটরনা মহুৎ শিন্দোকপগী থবক য়াম্না কন্না চত্থরি। হৌজিক ফাওবদা স্মার্ট মিটর লীশীং ৭০ রোম পানবা লোইরে। পানগদবা অপূনবা কঞ্জুমর মশীঙনা ১,৫৪,০০০ নি। ৱাৎহৌরিবা স্মার্ট মিটর খূদীঙমক মথঙ চহী ২০২৭ কি সেপ্তেম্বর থা ফাওবদা পানবা লোইশিল্লগনি হায়খি।
