মনিপুরদা ঈরাংনা শোকহল্লবা ঈমূঙ লীশিং ২৪ দি লৈঙাক্কি মতেং ফংদে হায়বগী মতাংদা য়েংশিন্নবা এস সিনা খঙহনখ্রে

কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসীদা লাঞ্জেন্নদুনা রিলিফ কেম্পশিংদা চঙজফম লৌদুনা লৈরিবা ইমূঙশিংগী মনূঙদগী হৌজিক ইমুং লীশীং ২৪ রোমদি লৈঙাক্না আই দি পিশিংদা পীবা মতেং অমত্তা ফংদ্রি হা‌য়বা ৱাকৎ অমগা মরী লৈননা লৈবাক অসীগী খ্বাইদগী মকোকথোংবা ৱায়েল লোয়শঙ ওইরিবা সুপ্রিম কোর্তনা, হীরম অসীগী মতাঙদা শেমখিবা হায় পৱার কম্মিটিদা থিগৎনবা খঙহনখ্রে।

সুপ্রিম কোর্তকী চিফ জষ্টিস সুর্য কান্ট, জষ্টিস জয়মালা বাগচি অমসুং জষ্টিস ভি মোহন্নাগী বেঞ্চনা ৱাফম অসী খঙহনখিবনি। হৌজিক ফাওবদা লৈঙাক্না শকখঙলবা বেনিফিসরি ৭০০০ কি মনূংদা ৪০০০ গী ওইনা মশাগী ময়ূম নৌনা শাগৎনবা শেনফম পীখ্রে। কচ্চা হাওসকি ওইনা য়ূম অমা শানবা লূপা লাখ মঙা, সেমি পক্কাগী য়ূম অমা শাবদা লূপা লাখ তরেৎ, অদূগা পক্কাগী য়ূম ওইরগনা লূপা লাখ তরাগী চাং দা পীখ্রে হায়রি।

প্রধান মন্ত্রী অৱাজ য়োজনা (গ্ৰামিন) গী মখাদা হীঙশাগী ঈরাং অসিনা শোকহল্লবা মীওইশিংগী য়ূম লীশীং ১২ শাননবা শেনফম পীখ্রে। টেম্পরেরি সেল্টরশিং শারে। মসীগীসু মথক্তা লৈঙাক্না শকখঙলবা বেনিফিসরি ৮৮৫ গী য়ূম শানবা পূন্না লূপা ক্রোর ৫১.৯৫ পীখ্রবনি। পূম্নমক অসীগী মথক্তা মশাগী য়ূম মৈনা তুম্না মাঙহন-তাকহনখ্রবা ঈমূঙ খূদিংদা রিলিফকি তেঙবাং লূপা লাখ অমমমসু য়েন্থোকখ্রে হায়রি। পূম্নমক অসী পাঙথোকখ্রে হায়রবসু ঈমূঙ লীশিং ২৪ দি লৈঙাক্কি তেঙবাং অমত্তা ঙসী ফাওবা ফংখিবা লৈত্রি হায়বা ৱাকৎ অসী থাঙ্গৎলকপদা সুপ্রিম কোর্তনা অঙকপা ফোঙদোকখিবগা লোয়ননা হীরম অসীগী মতাঙদা থিগৎনবা,হায় পৱার কম্মিটিদা খঙহনখিবনি।