নূংবা কম্যুনিটি হেল্থ সেন্টরদা মৈ ফংদবদগী অঙাঙ উনবগী থবক্তা দাক্তরনা টোর্চ লাইট শীজীন্নরি: পুয়া

পিপল্স য়ুনাইটেদ য়ূথ এল্লায়ন্স (পুয়া) অমসুং ফূটহীল্স নাগা কোওর্দিনেসন কম্মিটি (এফ এন সি সি) অনীনা মনিপুরগী চীং অমদি তম্পাক্কি তোঙান তোঙানবা মফমশিংদা লৈরিবা হেল্থ ফেসিলিটিশীংদা কোয়না চত্তুনা হৌজিক হৌজিক মফমশিং অদূগী ওইরিবা ফীভমশিং য়েংশিল্লিবা অদূগী শরূক অমা ওইনা ঙরাংসু মখা তানা নোনে দিষ্ট্রিক্টকি মনূঙচন্না লৈরিবা নূংবাগী প্রাইমারি হেল্থ সেন্টর ( পি ঐচ সি) গী ফীভম য়েংশিল্লুবদা অঙকপা মওংদা লায়েংবগী থবক চত্থরম্বা থেংনখ্রে হায়রি।

হেল্থ সেন্টর অদূ মৈগী বিল লূপা লাখ ৭ হেন্না তোনশিনখিবা মরম্না মরী লৈনবা মৈগী দিপার্টমেন্ট না ঙসীদগী চহী ৪/৫ গী মমাঙদগী মৈ ককথৎখিবদগী সেলকো হায়না খঙনবা কম্পেনি অমগী মখাদা সোলর লাইট শীজীন্নদুনা অনা-লায়েঙগী থবক-থৌরমশিং চত্থদুনা লৈহৌরি হায়রি। পুয়া অমসুং এফ এন সি সিগী অপূনবা টিম্না চত্থখিবা য়েংশিন-খোঙচৎ অদুদা মখাতানা থেংনরকখিবা পাউদম মতূঙ ইন্না, প্রাইমারি হেল্থ সেন্টর অদুদা লৈঙাক্কি রেগ্যুলর দাক্তর অমা, কোন্ট্রেক্ট তা থম্বা দাক্তর অনীগা লৈরি। নর্সনচিংবসু  অয়াম্বদি মহূৎ শিন্নরগা থাগী তলব ওইনা খরা খরা পীদুনা, য়ানবগী মতূঙ ইন্না থবক পুবা ঙাক্তা ওইরমখি হায়রি।

এক্স-রে মেচিন শীজীন্নবা য়াদ্রি। অতৈ ইক্বিপমেন্তশিংসু ইলেক্ত্রিককি মৈ ফংদবদগী শীজীন্নবা য়াদনা লৈহৌরি হায়না পাউদম্লক্লি। সোলর লাইট শীজীন্নরি হায়রবসু হৌজিক নোংজুথা মতম ওইবনিনা নুমিৎকি মঙাল নীংথিনা ফংদবনা অয়াম্বা ওইবনা কান্নফম খঙদনা লৈহৌরি হায়না ফোঙদোরক্লি।কুন্মাথোইশুবা চহীচা অসিদা ইলেক্ত্রিক য়াওদনা মনিপুরগী চীঙগী লমশিংদা অনা-লায়েঙগী থবক চত্থরিবা হেল্থ সেন্টরশিং অসী য়াম্না খুদোংথীনিঙায় মশক্নি হায়না পুয়াগী জেনরেল সেক্রেটরি লোংজম অবোথে না ফোঙদোরক্লি।