বোসেমগী চ্যেরমেন, সেক্রেটরি রিগুলর বেসিসতা হাপ্নবা হোৎনরগনি:গভর্নর

বোর্দ ওফ সেকেন্দরি ইদুকেসন মনিপুর (বোসেম) গী চ্যেরমেন অমসুং সেক্রেটরি ঙাইহাক লৈতনা শিন্দোক-শিঞ্জিন তৌবা অসী য়ানিংদে, মরূওইনা এগজাম নকশীল্লক্লবা মতমদা বোসেমগী মকোকথোংবা লুচিংবশিং শিন্দোক-শিঞ্জিন তৌবা অসী লৈঙাক্কি অচূম্বা থৌশিল ওইরোই হায়না মনিপুরগী মহৈরোয় লূপ তরূকনা গভর্নরগী পূক্নিং চিংশিনখ্রে।

মসিগী পাউখুম ওইনা গভর্নরনসু বোসেমগী চ্যেরমেন অমসুং সেক্রেটরি গী ফমশিং অসী রেগুলর বেসিসতা হাপ্ননবা হোৎনরগনি হায়বা ৱাফম ফোঙদোরকখ্রে।অনৌবা একাদেমিক সেসন ২০২৬-২৭ হৌগদবা মতমদি য়ৌশিল্লক্লে অদুগা অমরোমদনা স্কুলশিংগী মহৈরোয়শিংদা টেক্সবুক ফংহনগদৌরিবা অথোরিটিসু বোসেম্নি।য়াম্না লুরিবদি ঙসীফাওবা বোসেম্না টেক্সবূকশিং পুথোক্ননবা থৌরাং অমত্তা লৌখত্রি।টেক্সবূকশিং নম্ননবা চে ফাওবা লৈননবা,চেন্ননবা হোৎনদ্রিবসি য়াম্না লাইবক থীবা অমনি হায়না মহৈরোয় লূপ তরূকনা ঙরাং মনিপুরগী গভর্নর অজয় কুমার ভাল্লাগা উনখিবা অমদা ফোঙদোকখি।

ঙরাং অয়ূক পূঙ ১১.৩০ তাবদা মহৈরোয় লূপ তরূকনা গভর্নরগা উনখিবা অদুদা মতম চানা, অফবা চেদা নম্লবা মহৈরোয়শিংগী টেক্স বূকশিং ফংহন্নবা থৌরাং তৌবিয়ু হায়না তকশীনখি।লৈঙাক্না বোসেমবু কাং-খোং চাইহন্নবা থৌশিল পায়খৎপিগনু হায়না তকশীনখিবগা লোয়ননা কুমশিং ২০২১ গী মার্চ থাদা থোকখিবা লৈঙাক্কি ওফিস মেমোরেন্দমগী মতূঙ ইন্না,করিগুম্বা ফীভম্না য়ারক্তবদগী বোসেমগী চ্যেরমেন নত্রগা সেক্রেটরি শিন্দোক্তবা য়ারক্ট্রবদি মাঙজৌননা থা অহূমগী মমাঙদা খঙহনগদবনি হায়বা ৱাফমসু লৈরিবনি অদূবু লৈঙাক অসীনা মশানা শেমজবা রুল অদু মশামক্না অমুক থুগাইবগী থৌওং চত্থরকপসি পেন্দে হায়না মহৈরোয় লূপ তরূক কি লুচিংবশিং অদূনা গভর্নরদা ফোঙদোকখি।