এম এল এশিংনা মশাগী দাইত্য মশক খঙলক্তবদগী মীয়াম অৱাবা মায়োক্নরিবনি:এল তোম্বা

মনিপুরদা হৌজিক মায়োক্নরগা লৈরিবা মীয়ামগী নীঙবা থুংলক্তবগী,লম্বী-থোং শেম্বীদবগী অমদি অতৈ হীরমশিংদা পেন্নদবগী খোল্লাউশিংনা নিল্লক্লিবসি মরী লৈনবা কেন্দ্রশিং অদূগী এম এল এশিংনা মশাগী দাইত্য মশক খঙলক্তবদগী ওইরকপা,থোক্লকপা ঙাক্তনি হায়না ফাউন্দেসন ফোর রুরেল অর্বান দেভলপমেন্ট মনিপুরগী প্রসিদেন্ট এল তোম্বনা ফোঙদোরকপগা লোয়ননা লৈঙাক্কি থৌশাদবা থৌওংশিংবু অকনবা মওংদা পেন্দবা ফোঙদোকখ্রে। হৌজিক ৱাংখৈ অয়াঙপল্লি লম্বী পরীংদা মীয়াম্না লম্বী থিংবগী খোঙজঙ কয়ামরুম চঙশীন্দুনা লৈরি।

লম্বী অসীগী নাকন অনীমক্তা লৈঙাক অসীনা ইভিক্সনগী মিংদা লন্নাই মীওইশিংগী য়ূম-কৈ লীশীং কয়ামরুম থুগাইরম্বা,ঈরম-নালা শেম্বগীনি হায়দুনা তৌখায়বা,খোক্কায়বা তৌদুনা থম্লম্লগা লম্বীগী ময়ায়দা লৈপাক থোনগত্তুনা থমজিল্লম্লগা ঙসীফাওবা হন্না য়েংদনা তূমিন্না লৈশিনখ্রে।মসীনা মরম ওইদুনা নোংমগী চরা তান্ননবগীদমক চৎথোক -চৎশীন তৌরিবা সধারন মীয়ামদা লম্বী চৎপা য়াদবগী,উফূল-ৱাইফুলনা খুদোং চাহন্দবগী ফীভমশিং মায়োক্নরগা লৈরি।ফীভম অসী অসূম অসূম অকীবগী মশক ওইবা হেঙ্গৎলক্লি।মসীনা মরম ওইরগা মীয়ামগী হকশেলদা চাউনা অকায়বা পীরকপা য়ারি।লংস কেন্সর ফাওবা থোকহল্লকপা য়াবগী অকিবা লৈরে হায়না তোম্বনা পেন্দবা,নুংনাংবা ফোঙদোরক্লি।

মীয়াম্না পেন্দবশিং ফোঙদোক্তুনা অকনবা ঈহৌ চত্থরিবা অসী মরী লৈনবা এম এল এশিংনা চোংথোকপিরক্তুনা করি-করম তৌরগা মীয়ামগী অৱাবা ময়ামসি কোকহনগদগে খন্দনা খঙশীন্নদনা তূমিন্না লৈরিবসি মশাগী দাইত্য মশক খঙদবা মতৌনি।থাগী তোলোপ লৌদুনা লৈরিবা মীয়ামগী মীহূৎশিং এম এল এ ওইদ্রে হায়না নাথৈদুনা লৈরগে খনবীগনু।খুরায় কেন্দ্রগী এম এল এ লৈশাংথেম সুসিন্দ্রোনা মহাক্কি কেন্দ্রদা শেমগৎ-শাগৎলিবা ময়ামসি তমজনিঙায়নি হায়না তোম্বনা ফোঙদোকখি।