মনিপুরগী লো এন্দ ওর্দরগী ফীভমদি হায়নিঙায় লৈতনা ফত্তনা লৈরিবা,চহী অনীমখায় ফারক্লবা হীঙশাগী ঈরাঙ ঙসীফাওবা মমাঙদা লৈরম্বা বি জে পিনা লুচিংবা মীয়ামগী লৈঙাক অমসুং তুংদা লৈরকখ্রবা পি আর লৈঙাক অনীমক্না লাকশীন্নবা হোৎনবগী মহূত্তা মনিপুরদা ঈরাং অমত্তা লৈত্রে হায়না মালেমগী মীয়ামদা তাৎ তৌবা য়াননবা অমসুং সঙাই ফেষ্টিভেলগী কাইথোকখ্রবা বদজেটকি শেনফম মখোয় মশেল শায়েল -ঙায়েন্নবা য়াননবা পাঙথোক্লকপগী মায়োক্তা ঙরাংসু আই দি পিশিংনা অকনবা ঈরাং হৌরকখ্রে। আই দি পিশিং অসীনা হন্দক নোংমা কাংদনা চত্থরক্লিবা ঈরাঙ অমসুং ঈহৌশিং অসী পি আর লৈঙাক্না মনিপুরদা হন্দক নবেম্বর ২১ দগী হৌরগা সঙাই ফেষ্টিভেল পাঙথোকখিবদগী কা হেন্না মৈ হৌদুনা চঙশীল্লকপনি।ঈরাঙ অসী নোংমা- নোংমগী কন্সীল্লক্লি।
ঙরাং শওম্বুং অমসুং শজিৱা জেল মনাক্তা চঙজফম লৌদুনা লৈরিবা, ইকৌ, সদু য়েনখোমাঙ,দোলাইথাবিনচিংবদগী লাকখিবা আই দি পিশিংনা মখোয় মশাগী হান্নগী ময়ূম লৈফমশিংদা চৎচরগে,কনাদসু খৎনবা হৌবগী নত্রগা ৱারৌবগী থৌওং নত্তে হায়না ঙরাং অয়ূক পূঙ ১১রোম তারকপদা দোলাইথাবী মখা লৈকায়ফাওবা চঙশীল্লকপগা লোয়ননা দোলাইথাবিদা লৈবা বফর জোন নমখায়দুনা দোলাইথাবি অৱাং লৈকায় ফাওবা চৎননবা হোৎনরকপদগী মনিপুর পুলিস অমসুং সেন্ট্রেল সেক্যুরিটি ফোর্স শিংনা থৎতুনা থমখিবদগী চাউনা মূক্নরকখিবা থৌদোক্তা পুলিসনা ত্যার গ্যাস সেল কয়ামরুম কাপখি।
আই দি পিশিং অদূনসু নূঙনা পুলিসকি মায়কৈদা থোমজিল্লকখিবদা মীওই মঙা শোকখি অদূগা পুলিসকি গারি ১০ সু অমাঙ- অতা থোকখি। আই দি পিশিংনা বার্ব ৱায়রশিং নমখায়দুনা চঙশীনখ্রবা মতূঙ দোলাইথাবি অৱাং লৈকায় মায়কৈরোমদা কিলোমিটর অনীরোম চঙশীনখিবদগী সেক্যুরিটি ফোর্সনা মখোয়বু চঙশীন্দনবা খঙহনখি।মদূফাওবদা তারক্তবদগী ত্যার গ্যাস সেলশিং কাপতুনা তানখায়খিবনি।