এম্বুস তৌদুনা এ আর পার্সনেল অনী হাৎখিবা, মঙা শোকহনখিবা থৌদোক্তা চেন্নবনি হায়বা মারুটি ভেন অমা পুলিসনা ফংবা ঙমখ্রে

হন্দক সেপ্তেম্বর ১৯ দা নম্বোল পুলিস ষ্টেসনগী মনূঙচন্না লৈরিবা নম্বোল সাবল লৈকায়দা ৩৩শুবা আসাম রাইফলসকি কনভোই অমদা শকখঙদবশিংনা এম্বুস তৌরকখিবা থৌদোক্তা এ আরগী নাইক সুবেদার অমা য়াওনা পার্সনেল অনী হাৎখিবা, অদুগা পার্সনেল মঙা শোকহনখিবা থৌদোক্তা চেন্নবনি হায়বা মারুটি ভেন অমা পুলিসনা ফংবা ঙমখ্রে।
এম এন ০১-দব্লিয়ু- ৬৬২৪ হায়রিবা রেজিষ্ট্রেশন নম্বর অসী থাবা মারুটি ভেন অদু ৱাঙ্গোই পুলিস ষ্টেসনগী মনূঙচন্না লৈরিবা মুতুময়াংবী এরিয়াদগী ঙরাং অয়ুক পুলিসনা ফংখিবনি। লম্বীগী মতাইদা মরম চাদনা ভেন অদূ খাম্লম্বা উবদগী পুলিসনা মপূ কনানো হায়না থিরকপদা মপূ অমত্তা চোংথোরকখিদে।গারী অদূগী মনূঙদা আর সি বূক অমা য়াওরম্বা পুলিসনা থেংনবদগী চঙাঙ্গৈ ময়ায় লৈকায়দগী চোংথাম নেহরু কৌবা অমগী ভেননি হায়বা খঙবা ঙমখি।

পুলিসনা নেহরুবু ময়ূমদগী লৌখত্তুনা ৱাহং-পাউহং চত্থরকপদা মহাক্না গারিদু মশাগীনি হায়না য়াজখি, অদুম ওইনমক চহী খরগী মমাঙদা মীওই অমদা য়োন্থোকখ্রবনি হায়না খুম্লকখি হায়রি। পুলিসনা অনীশুবা মপূ অদূ অমুক কৌখত্তুনা ৱাহং- পাউহংবদা মহাক্নসু অহুমশুবা মীওই অমদা চহী খরগী মমাঙদা য়োনখ্রে হায়বদগী অহূমশুবা গারি মপূদু কৌখত্তুনা মখাতানা ইন্টরোগেসন চত্থবদা মরিশুবা মীওই অমদা অমূক মহাক্না য়োনখ্রে হায়না খুম্বগা লোয়ননা মঙোন্দগী ভেন লৈখিবা মীওই অদূ কদায়দগীনো, কনানো হায়বা চপ চানা নীংশিংবদি ঙমদ্রে হায়না পাউখুম পীরকখি হায়রি। হৌজিক গারীগী অশেংবা মপূদু কনানো হায়বা অসীগী মতাঙদা মখাতানা পুলিসনা থিজিনবগী থবক চত্থবা হৌখ্রে।