ঙসী অয়ূক পূঙ ১১.৩০ তাবদা প্রাইম মিনিষ্টর নরেন্দ্র মোদিনা মনিপুরদা লাক্কদৌরিবা অসীগী মতাংদা ষ্টেট হোম দিপার্টমেন্টনা লৌখৎলিবা সেক্যুরিটিগী থবক-থৌরমশিং অমসুং অতৈ শেমগৎ- শাগৎলিবশিং মনিপুরগী দিরেক্তর জেনরেল ওফ পুলিস (দিজিপি) রাজিব সিংহ, আই পি এসনা য়েংশিনখ্রে।
কংলা মনুং অমসুং অকোয়বা মফমশিং, প্রাইম মিনিষ্টর না চত্থোক-চৎশীন তৌগদবা মরুওইবা লম্বীশিংদা দিপ্লোই তৌরিবা সেক্যুরিটি পার্সনেলশিং, চুরাচান্দপুরদা লৈরিবা পিচ গ্ৰাউন্দ মনূঙ অমসুং অকোয়বা মফমশিংদসু মশীঙ য়াম্লবা সেন্ট্রেল অমসুং ষ্টেট ফোর্স দিপ্লোই তৌরিবশিং দিজিপি না রিভ্যু তৌখি।
থা অসীগী ১১ দা চুরাচান্দপুরদা থোকখিবা ঈরাং অদুগী মতূঙদা হৌজিক মখাতাবা পামদবা থৌদোক অমত্তা থোকপা লৈত্রি। লম্বীশিংদা স্কৱাদ দোগ শীজীন্নদুনা থিবা- হুম্বগী অকনবা থবকশিং পায়খৎলি।