চিন-কুকি, মিজো অমসুং মার কাঙলূপশিংগী মরুওইবা মফম অমা ওইরিবা মনিপুরগী চুরাচান্দপুর দিষ্ট্রিক্ট অমসুং কাঙলূপশিং অসীনা চাদা ৯০ গী চাংদা লৈরিবা মিজোরাম অনীগী মরক্তা মহৌশাদগী লৈনরক্লিবা অমত্তা ওইবগী, পারী-পুরী তিন্নবগী, লোল অমসুং চৎনবী মান্নবগী পুৱারি অদূ মখাতানা লৈহন্ননবা অমদি হেন্না নকশীন্নবা মরী থম্ননবা পান্দমদা মিজোরামগী আইজোলদগী চুরাচান্দপুর অনীগী মরক্তা হেলিকোপ্তর সার্বিস অমা চাং নাইনা থম্ননবা মিজোরাম লৈঙাক্না থৌরাং লৌখৎপা হৌখ্রে।
মনিপুর, মিজোরাম অমসুং অসামগী মার ষ্টুডেন্টস এসোসিয়েসনগী লুচিংবা মীহুৎ কাঙবূ অমগা উনবদা মিজোরামগী চিফ মিনিষ্টর লালদুহোমানা ৱাফম অসী ফোঙদোকখিবনি। ঈগী মরী-মতা ওইরিবা কুকি-চিন, মিজো কাঙলূপশিং অসীগী মরক্তা হেন্না নকশীন্নবা অমসুং নুংশিনবগী মরী শাগৎনবা পান্দমদা য়াম্না অথূবা মতমদা চুরাচান্দপুরদা মিজোরাম হাওস অমসু শাননবা থৌরাং তৌরি হায়না চিফ মিনিষ্টর লালদুহোমানা ফোঙদোকখ্রে।
মনিপুরদা হৌখিবা কুমশিং ২০২৩ গী মে অহুমদগী হৌরকখিবা হীঙশাগী ঈরাং অসীনা মরম ওইরগা চুরাচান্দপুর অমসুং ফেরজোল দিষ্ট্রিক্ট তা লৈরিবা কুকি-চিন, মিজোশিংনা মপানগী লৈবাকশিং অমদি ইন্দিয়াগী অতোপ্পা ষ্টেটশিংদা চৎপা মতমদা আইজোল ফাওরগা চৎপগী ফীভম অমা অদূম্মক উবা ফংলি। মহৌশা, চহী অহুম-মরীগী মমাঙদা মনিপু্র লৈঙাক্না চুরাচান্দপুরদগী আইজোল য়ৌবা হেলিকোপ্তর সার্বিস হাংদোকখিবদু হৌজিকতি চাং নাইনা সার্বিস তৌখিদবদগী মীয়াম অসীগী চৎথোক-চৎশীন তৌবদা চাউনা খুদোংচাদবা মায়োক্নরগা লাক্লি হায়না পাউগী লীখূন অমনা ফোঙদোরক্লি।