চৎলিবা সেপ্তেম্বর থা অসীগী ১৩ দা প্রাইম মিনিষ্টর নরেন্দ্র মোদি ইম্ফালদা শোয়দনা থুংলরগনি। মহাক্না অহানবগী ওইনা চুরাচান্দপুরগী পব্লিক গ্ৰাউন্দা মীয়াম তিনবা মীফমদা ৱা ঙাঙলবা মতূঙ কুকি-জো কাঙলূপকি এম এল এ শিংগা ৱারী শানগনি অদুগা মদূগী মতূঙ অমুক ইম্ফালদা লাক্লগা কংলাদা মীয়ামদা ৱা ঙাঙগনি।
কংলাদা প্রাইম মিনিষ্টর না মীয়ামদা ৱা ঙাঙগদৌরিবা মফমদা শেম-শারিবশিং অদু স্পিসিয়েল প্রোটেক্সন গ্ৰুপ ( এস পি জি) গী এদ্দিস্নেল দিরেক্তর অমনা লুচিংবা টিম অমনা য়েংশিনখি। প্রাইম মিনিষ্টরনা কংলাদা মীয়ামগা উনরবা মতূঙদা মৈতৈ কাঙলূপকি এম এল এশিংগা তোঙান্না অমূক উনরম্লবা মতূঙদা ন্যু দিল্লিগীদমক ইম্ফাল থাদোকখিগনি হায়রি।
কুকি-জো কাঙলূপকি মীয়াম্না প্রাইম মিনিষ্টর লাকপদা ওক্ননবনি হায়দুনা কোফিন ময়াম পরেং লেংদুনা থম্লম্বা অদূদি দিষ্ট্রিক্ট এদমিনিষ্ট্রেসন্না মরী লৈনবশিংগা ৱারী শানরবা মতূঙদা সেক্যুরিটি ফোর্সনা লৌথোকখ্রে। প্রাইম মিনিষ্টর গী খোঙচৎ অসী মায় পাকহন্ননবা মনিপুরগী গভর্নর অজয় কুমার ভাল্লানা চুরাচান্দপুরদা চত্তুনা কুকি-জো কাঙলূপকি এম এল এ শিংগা হন্দক ৱারী শানবসু লৈখ্রবনি।