ঈরাং থোকখ্রবা মতূঙ ইহান হানবা ওইনা থাদৌ-মৈতৈ ইম্ফালদা ফম্মিন্নদুনা শান্তি হঞ্জিল্লক্নবা ৱারী শান্নখ্রে

মনিপুরদা হৌখিবা কুমশিং ২০২৩ গী মে ৩ দগী ঙসীফাওবা চত্থরক্লিবা হীঙশাগী ঈরাং অসীগী চৈরক্তা ঈহান হানবা, শীঙথানিঙায় ওইনা ঐতিহাশিক ওইবা খোঙথাঙ অমদা থাদৌ ঈনপি মনিপুরগী দেলিগেট টিম অমা ঙরাং ইম্ফালদা লাক্তুনা তম্পাক্কি তোঙান-তোঙানবা সিভিল সোসাইটি ওরগনাইজেসন শিং, নূপী লূপশিং অমসুং মহৈরোয় লূপশিংগী লুচিংবা কয়াগা পূন্না ফম্মিন্নরগা লমদমসিদা মহৌশাগী নুংশিনবা অমদি ঈঙ-তপ্পা শক্তম হঞ্জিলহনবা য়াননবা ৱাফম কয়ামরূম খন্নখ্রে। ইম্ফালগী নোরথ এ ও সিদা লৈরিবা ক্লাসিক হোটেলগী কনফরেন্স হোলদা পাঙথোকখিবা ঐতিহাসিক ওইরবা মীফম অদুদা কোকোমি, অমুকো, ফোক্স, অরম্বাই তেঙ্গোল, নূপী লূপশিং, দেসাম, কে এস এ, সুক, অপূনবা ঈরৈবাক্কি মহৈরোয় লূপ হায়রিবা মহৈরোয় লূপশিংগী লুচিংবা কয়াসু শরুক য়াখি।

কুকিশিংনা মতম লৈবা খিবিক্তা “এনি কুকি ট্রাইব”, হায়বা নোমেনক্লেচর অমা শীজীন্নরগা মনিপুরগী য়েলহৌমী ফূরূপ অমা ওইরিবা থাদৌ কম্যুনিটিবু চিংশিন্ননবা হোৎনদুনা, অতৈ ফূরূপশিংনা কুকি ওইনা উহন্ননবা শরৌ শীজীন্নদুনা লাক্লিবদু অচূম্বা নত্তে। মদূ মীয়ামদা ঊৎ চাইদুনা থাদৌ কম্যুনিটিবু লান্না উহন্ননবা হোৎনরক্লিবনি। থাদৌশিংদি লমদমসিগী য়েলহৌমী কাঙলূপ অমা ওইনা ময়েক শেংনা লৈজরিবা কম্যুনিটিনি। থাদৌদি থাদৌ ওইনা লৈগনি। করিগুম্বা হীরম নত্রগা মওং অমত্তদা থাদৌগা কুকিগা মরী লৈনদে হায়বসি মমাঙদগী হৌনা থাদৌ ঈনপি না শেংদোক্তুনা লাক্লিবনি হায়না থাদৌ ঈনপি মনিপুরগী জোইন্ট জেনরেল সেক্রেটরি মাংদৌ থাদৌনা ফোঙদোরক্লি।

মেদিয়া আউটলেটশিংনা পাউ ফোঙবা মতমদসু থাদৌ-কুকি হায়বসি শীজীন্নবিগনু,থাদৌ-কুকি হায়বা কম্যুনিটি অমত্তা মনিপুরদা লৈতে হায়না অকনবা ৱাফম তকশীল্লক্লি। থাদৌ ট্রাইব নত্রগা থাদৌ ঈনপি হায়না রিপোর্টিং তৌবিয়ু হায়রক্লি।