মহৈরোয় হায়বসি খুন্নাই অসীগী, লৈবাক অসীগী চূপ্লী পায়দুনা লৈবাক অসীগী মীয়াম্বু লমজীঙগদৌরিবনি, ইন্দিয়াবু মালেমগী কম্যুনিটিশিংগী মমাঙদা খ্বায়দগী অৱাংবা থাক্কি ফিদা অমা কলহন্ননবা, মালেমগী মীয়াম্না ইজ্জৎ তৌনহন্ননবা লমজীঙগদৌরিবা মরুওইবা মীরোল অদূনি হায়বসি পূম্নমক্না খঙনরবা অমনি।
মরম অসীনা দিগ্ৰি খক ফংলগা লোইরে খল্লগা মহৈ তম্বগী মহূত্তা খুন্নাইগী মীয়ামদা খ্বায়দগী অচৌবা মতেং পীবা ঙম্বা, মীয়ামগী অৱাবা কোকহনবা ঙম্বা মীওই অমমম ওইনবগী ৱাখল্লোন্না মাঙদা থম্লগা অফবা ৱাখল্লোন্না মাঙদা থম্লগা থবক পায়খৎকদবনি। ৱাখল চুম্না খনবা, চুম্না থবক তৌবা তমগদবনি হায়না মনিপুরগী গভর্নর অজয় কুমার ভাল্লানা ফোঙদোকখ্রে। ইম্ফালগী তাকয়েলপাত্তা লৈবা গভর্নমেন্ট পোলিটেক্নিক্কি হোলদা পাঙথোকখিবা মনিপুর টেক্নিকেল য়ুনিভর্সিটিগী ১০ শুবা ফাউন্দেসন দে থৌরমদা অথোয়বা মীথূঙলেন ওইনা ৱা ঙাঙখিবা গভর্নর না মহাক্কি ৱাফম অসী ফোঙদোকখিবনি।
থৌরমদুদা ধনমঞ্জুরি য়ুনিভর্সিটিগী ভাইস চাঞ্চেল্লর দব্লিয়ু চন্দ্রবাবু সিংহ, মনিপুর টেক্নিকেল য়ুনিভর্সিটিগী রেজিষ্ট্রার রামানন্দ নোংমৈকাপ্পমনচিংবা শরুক য়াখি।মহৈরোয়শিংনা মশাগী দাইত্য মশক খঙনা, কম্যুনিটি খূদিংমকপু চপ মান্নবা মীৎয়েংদা য়েংদুনা অপূনবা মনিপুর অমা শেমগৎনবা, চাওখৎপা, নুঙাই-য়াইফবা, নুংশিনবদা য়ূম্ফম ওইবা পুন্সিরোল অমা শেমগৎনবা থবক তৌগদবনি হায়খি।