ষ্টেট লেন্দশিংদা য়ূম- কৈ শাজিনবা, ফুটপাট, দ্রেন্নচিংবদা খোপচীন্দুনা দুকান, হোটেলনচিংবা শাজিন্দুনা মীয়ামগী চৎথোক-চৎশীন্দা অকায়বা পীবগী মথক্তা আইনগী ৱাংমদা লৈঙাক্কি লম খোপচীন্দুনা মরন্নাইগী প্রোটর্টি ওন্থোক্ননবা হোৎনরিবা মীওইশিং মশক খঙদোক্তুনা আইনগী থবক লৌখৎনবা অমসুং খোপচীল্লম্বা লমগী শরুকশিং মাঙহন্দনা থম্ননবা পান্দমদা মনিপুরগী দিষ্ট্রিক্ট খূদিংমক্তা মরী লৈনবা দিষ্ট্রিক্ট এদমিনিষ্ট্রেসনশিংনা মীৎয়েং চঙদুনা ইভিক্সনগী থবকশিং হৌখিবা থা অমা-অনীগী মতমদগী অকনবা মওংদা চত্থদুনা লাক্লি।
মসীগী মনুঙচন্না ইম্ফাল সহরগী মনূঙদসু অসীগুম্বা লমহেন-তুহেনবশিংনা আইন কায়না খোপচীল্লিবা মফমশিং তকখায়বগী থবক- থৌরমশিং চত্থরগনি হায়না মাহুদকি দিরেক্তর ওইনা লৈরিবা ঙাঙোম উত্তম্না ফোঙদোকখ্রে। হৌখিবা এপ্রিল থাদগী হৌনা দিরেক্তরেট ওফ এনভাইরনমেন্ট এন্দ ক্লাইমেট চেঞ্জ, মনিপুর পোল্যুসন কন্ট্রোল বোর্দ, ইম্ফাল ম্যুনিসিপাল কোরপোরেসন অমসুং মনিপুর পুলিসনা খূৎশম্নরগা চত্থরকখিবা সিঙ্গল য়ূজ প্লাষ্টিক্কি পোৎলমশিং ফাগৎলকখিবা কয়াদু গুৱাহাটিদা রি-সাইকল তৌননবা লমথাবগী থৌরম অমা ঙরাং ইম্ফাল ম্যুনিসিপাল কোরপোরেসনগী ওফিস তা পাঙথোকখিবা থৌরমদা শরুক য়াখিবা দিরেক্তরনা ৱাফম অসী ফোঙদোকখিবনি।
মতম খরা য়ূম- কৈ শীদোকপগী মতম ঙাইবিয়ু হায়বদি য়াগনি অদূবু থবকসিদা কোমথোকপিয়ু হায়বদি তৌবিরক্কনু হায়না মহাক্না ফোঙদোকখি।