কে সি পি নোংদ্রেনখোম্বা গ্ৰুপকি আর্মী চিফ য়াওনা অন্দরগ্ৰাউন্দ কাদরশিং ফাগৎপা ঙমখ্রে

মনিপুরদা হৌখিবা কুমশিং ২০২৩গী মে অহুমদগী কুকি-জো কাঙলূপকি মিলিটেন্টশিংনা কাইহৌরকপদগী ঙসীফাওবা মৈতৈ কম্যুনিটি না খুন্দারিবা মফম কয়াদা লান্দারক্তুনা মীহাৎ-মীপুন, চত্থরকপা, য়ূম- মৈ পাক্তক্ননা থাদোকপা, লম্বী থিংদুনা নেস্নেল হায়ৱে পরীংদা লাকপা গারীশিং লুট তৌবদগী অমসুং দ্রাইভরশিং ফূবা, হাৎপা কয়া তৌরক্লিবসিগী মতূঙদা কম্যুনিটি অনী অসীগী মরক্তা হৌজিক উনবা য়ানদবগী ফীভম মায়োক্নরগা লৈরিবা চৈরকসিদা ঈরাং অসী নমথনবা পান্দমদা মনিপুর পুলিস অমসুং সেন্ট্রেল সেক্যুরিটি ফোর্সনা অকনবা ওপরেসনশিং চত্থদুনা, খুন্নাইসিদা খূৎলায়শিং পায়দূনা হীঙশাগী ঈরাং চত্থবশিং লাকশীনবা ঙম্ননবা থবক- থৌরম কয়া লৌখৎলক্লি।
তোঙান- তোঙানবা মনিপুরগী চীঙ অমসুং তম্পাক্কি মফম কয়াদা থিবা-হুম্বগী থবকশিং চত্থরক্তুনা মশীঙ য়াম্লবা খূৎশু-খূৎলায়শিং অমসুং আইন্না য়াদবনি হায়না লাউথোকখ্রবা খূৎলায় পায়বা অন্দরগ্ৰাউন্দগী কাদরশিং পাক-সন্না ফাগৎপসু লেপ্তনা চত্থরক্লি। মসীগী শরুক অমা ওইনা ঙরাংসু বিষ্ণুপুর দিষ্ট্রিক্টকি মনূঙচন্না লৈরিবা ফূবালা পাত্তোনগী খাংপোকশঙ অমদগী কংলৈপাক কম্যুনিস্ট পার্টি (কে সি পি) নোংদ্রেনখোম্বা গ্ৰুপকি আর্মী চিফ য়াওনা কাদর মরি ফাগৎখ্রে।
সেক্যুরিটি ফোর্স না ফাগৎখ্রবা কে সি পি নোংদ্রেনখোম্বা গ্ৰুপকি আর্মী চিফ অদুগী মিংনা মোইরাংথেম বিরমনি মৈতৈ (৪৬) কৌই হায়রি। কম্বাইন টিম অদূনা অতৈ তোঙান তোঙানবা মফমশিংদা চত্থখিবা ওপরেসন্দসু প্রিপাক প্রোগী তেলেম নাউবা, কে ৱাই কে এলগী কৈশাম ৱিলসন অমসুং থোকচোম সনাথোই কৌবা কাদর অহুমসু ফাগৎপা ঙমখ্রে। মখোয়বু মরী লৈনবা পুলিস ষ্টেসনশিংদা শিন্নখিবগা লোয়ননা মখাতানা থিজিবা হৌখ্রে।