ইন্দিয়াগী লান্মীশিংনা হন্দক ওপরেসন সিন্দুরগী মখাদা এয়র ষ্ট্রাইক চত্থদুনা পাকিষ্টান ওক্যুপাইদ কাস্মির (পি ও কে) অমসুং পাকিষ্টানগী টেরিটোরি মনূঙদা টেরোরিষ্ট শিংনা লৈবা কেম্পশিংদা লান্দাখিবদু ইন্দিয়ানা পাকিষ্টানগী লম লৌশিন্নবা নত্তে, পাকিষ্টান্দা লান্দাবসু নত্তে, সূপ্নগী প্রিসিজন ষ্ট্রাইক চত্থদুনা টেরোরিষ্ট শিং অমসুং মখোয়গী ইনফ্রাষ্ট্রকচরশিংদা টারগেট তৌখিবনি হায়না দিফেন্স মিনিষ্টর রাজনাথ সিংহনা লোক সভাদা ফোঙদোকখ্রে।
পহলগাম টেরর এত্তেক অমসুং ওপরেসন সিন্দুরগী মতাংদা লোক সভাদা ঙরাং চত্থখিবা দিস্কসন অমসুং দিবেট্টা কংগ্রেসকি এম পি গৌরভ গোগোইনা অকনবা ৱাফম কয়া ফোঙদোকখ্রবা মতূঙ, মদূগী পাউখুম ওইনা দিফেন্স মিনিষ্টরনা মহাক্কি ৱাফম অসী ফোঙদোরকখিবনি। ঙসীফাওবদা পহলগাম টেরোরিষ্ট এত্তেক কি থৌদোক অদূদা চেন্নরিবা টেরোরিষ্ট ৫ নুমিৎ ১০০গী মতম হেল্লফাওবদা ফাগৎপা ঙমদে। মসী খ্বাইদগী লাইবক থীবা অমনি, লৈঙাক্কি পাঙদবা মতৌ ঊৎথোকপনি হায়না কংগ্রেস না লুচিংবা ওপ্পোজিসন পার্টিগী এম পিশিংনা য়ানীংদবা ফোঙদোকখি।
ওপরেসন সিন্দুর চত্থবা হৌখিবা মিনিট ২২ গী মনূঙদা টেরোরিষ্ট ১০০ হেন্না হাৎপা ঙমখি। পাকিষ্টানগী ইনফ্রাষ্ট্রকচর নত্রগা ইন্সটোল্লেসন অমত্তদা টারগেট তৌখিদে হায়বসি পাকিষ্টান লৈঙাক্না ময়েক শেংনা খঙবা অমনি। হৌজিকসু অদূ মঙায়, করিগুম্বা পাকিষ্টান্না পূকচেল শেংবগী মহুত্তা টেরোরিষ্টশিং মখাতানা শৌগত্তুনা ইন্দিয়াদা কাইহৌরক্লবদি অনীশুবা ওপরেসন সিন্দুর মায়োক্নগনি হায়না রাজনাথনা ফোঙদোকখি।