লৈবাক অসীগী লান্মীশিংনা ইন্দিয়াগী সোভরেন্টি অমদি অপূনবগী শক্তম কন্ননবা হোৎনবদা থৱায় থাবদা পাম্মুবা লৈতে। লৈবাক অসীগী নীংতম্বা ঙাক্নবগীদমক য়েক্নবশিংগা লান্থেংনবদা ঐখোয়গী মথৌনা মরীংজেল লৈরবা লান্মী কয়ানা নোক্না-নোক্না থৱায় থাখ্রে। মখোয়গীদমক জাতি অসীনা চাওথোকচবা পোকই হায়না মনিপুরগী গভর্নর অজয় কুমার ভাল্লানা ফোঙদোকখ্রে।
থা অসীগী ২৬ তা লৈবাক অসীগী মফমশিং শীন্থুংনা পাঙথোকখিবা কারগিল বিজয় দিবস পালনগী থৌরম মনিপুরদসু লৈঙাক্না শীন্দুনা পাঙথোকখি। ইম্ফালগী পেলেস কম্পাউন্দা লৈরিবা মনিপুর ষ্টেট ফিল্ম দেভলপমেন্ট সোসাইটি (এম এস এফ দি এস) কি ওদিটোরিয়মদা পাঙথোকখিবা থৌরমদুদা অথোয়বা মীথূঙলেন ওইনা শরুক য়াখিবা গভর্নরনা কারগিল লানফমদা থৌনা ফনা থৱায় কৎখ্রবা লৈবাক অসীগী লান্মীশিংদা ঈকায়খুম্নবা ঊৎতুনা লৈ-শু কৎখি।
কুমশিং ১৯৯৯ দা পাকিষ্টানগী রেঞ্জরশিং য়াওবা, অমসুং লৈবাক অদূনা শৌগৎপা টেরোরিষ্টশিংনা কাশ্মিরগী কারগিলদা ঙমখৈ লান্না চঙশীল্লক্তুনা লৈবাক অসীগী সোভরেন্টি অমদি ইন্টিগ্ৰিটিদা চাউনা শীঙনরক্তুনা লান্দারকখিবা মতমদুদা ইন্দিয়াগী লান্মীশিংনা ঊৎখিবা মথৌনা মরীঙজেল কয়া অদূবু লৈবাক শীন্থুংনা মীয়াম্না নীঙশীংদুনা ঈকায়খুম্নবা ঊৎখিবনি। কা হেন্না ঈংখ্রবা কারগিলগী ঈশীং-নুংশিৎ অমসুং কা হেন্না খুদোংথীনিঙাই ওইখ্রবা নোংজু-নুংশাগী চৈথেঙ কয়াদু তুংওইনরগা থৌনা ফরবা লৈবাক অসীগী লান্মীশিংনা টেরোরিষ্টশিং অমদি পাকিষ্টান রেঞ্জরশিংবু মায়থীবা পীদুনা লৈবাক অসীগী ঙমখৈদগী তকথোকখিবনি। তমথিরবা লানফমশিং অদুদা মনিপুরদগী লান্মী ৭ কি থৱায় মাঙখিবনি। মখোয়গী মফমদসু গভর্নরনা লুচিংদুনা মীয়াম্না ঈকায় খুম্নবা ঊৎখি।
