সেন্টর অমসুং ষ্টেট লৈঙাক্না কম্যুনিটি খূদীঙমক্তা চপ মান্নবা মীৎয়েংদা আইন চৎনহল্লবদি ঈং-তপ্পা, চাওখৎপা লমদম অমা ওইগনি: তোম্বা

মনিপুরদা মৈতৈ ফূরুপ্না লৈমীন্নরিবা কনাগুম্বা ফূরূপ অমত্তদা লান্না চৎখিবা নত্রগা কাইহৌরুবা, খৎনবা হৌরুবা অমত্তা লৈখিদে। মনিপুরগী অপূনবগী শক্তম কলহৌনবা, এনভাইরনমেন্ট অমসুং হোংলক্লিবা অঈঙ- অশাগী শক্তম কয়াসিনা ঐখোয় মীওইবদা পীরক্লিবা চৈথেঙ কয়া অসীদগী কঞ্জনবা উমং-ৱামঙ য়োকখৎশি, তুংগী মীরোল কন্ননবা দ্রগ থিংশি, পোপ্পি থাদুনা নহারোলশিং মাঙহন্নবা হোৎনগুমসি, মীতোপ চঙশীল্লকপগী থবক-থৌরমশিংদা শৌগৎকুমশি হায়রুবগীদমক কুকি-জো কম্যুনিটিনা মৈতৈদা ওন্সীন্দুনা হীঙশা চত্থরকপা হায়বসি অচূম্বা খোঙথাঙ নত্তে হায়না এল তোম্বনা ফোঙদোকখ্রে। অসীগুম্বা অরানবা তৌবশিং লৈবাক অসীগী আইনগী মখাদা চপচানা লৌখৎফম থোকপা অকনবা থবক লৌখত্তুনা অথীংবা পীননবা হোৎনগদবা সেন্টর অমসুং ষ্টেট লৈঙাক্না অচান-মীরায় নাইনা থবক তৌরকপদগী অমদি দিভাইদ রুলগী থৌশিল পায়খৎলকপদগী ঈরাং অসী লোইশিনবা য়াহন্দনা লৈরিবনি। সেন্টর অমসুং ষ্টেট লৈঙাক্না পূকচেল শেংনা ঈরাং লোইশিন্ননবা হোৎনরবদি মনিপুরদা চহী অনী মখায় মতম শাংনা লৈরক্লিবা হীঙশাগী ঈরাং লৈফম থোক্তে হায়না ফাওন্দেসন ফোর রুরেল অর্বান দেভলপমেন্ট, মনিপুরগী প্রসিদেন্ট ওইনা লৈরিবা এল তোম্বনা ফোঙদোকখি।

মহাক্না হায়, মনিপুরদা হৌজিক মৈতৈশিংনা তম্পাক লমগী পীকখ্রবা স্কৱার কিলোমিটর খরখক্কি মনূঙদা ক্রিক-ক্রিক ঈন্সীন্নদুনা অতৈ কম্যুনিটিশিংগা পূন্না, নুংশি-চান্ননা লৈমিন্নরি, চীঙদা লম লৈদুনা লৈরুবা, খুন্দারুবা য়াহন্দ্রি। অমরোমদা চীঙগী ঈচীল- ঈনাওশিংদি তম্পাক অমসুং চীঙ অনীমক্তা লম লৈদুনা মনীঙতম্না লৈবা য়াহল্লি। তশেংবদি লৈঙাক্না চপ মান্ননা অচান- মীরায় নাইদনা আইন শীজিন্নরগা মীপূম খূদীঙদা অরানবা তৌরুরগনা মতীকচাবা চৈরাক অমসুং অফবা, অচূম্বা তৌরুবগীনা মতীকচাবা মতেং পাংশিন্দুনা থাগৎপিগদবনি হায়না মহাক্না ফোঙদোকখি। লৈঙাক অমা লৈরি হায়বদু মীয়ামদা নীংথীনা খঙহনফম থোকপনি। রুল ওফ লো চৎনরিবা, দদেমোক্রেসি চৎপা ইজ্জৎ লৈবা লৈবাক অমনি হায়বদু মালেমগী অতৈ লৈবাকশিংদা খঙহনগদবনি। চহী অনীমখায় শাংনা নেস্নেল হায়ৱেশিং কাঙলূপ অমখক্না মরম লৈতনা, আইনগী ৱাংমদা থিংজিন্দুনা থম্লগা অতৈ তম্পাক্কি মীওই অমত্তা চৎপা য়াহন্দনা লৈরিবসি য়েংদুনা, তূমিন্না খাঙদূনা লৈরিবা ইন্দিয়ান সেক্যুরিটি ফোর্সকি থৌওং মালেমদা অমূক্তা থেংনদ্রি হায়না তোম্বনা অঙকপা ফোঙদোকখি।

মীচম্না মশাগী লম মচেৎ অমখক য়োঞ্জনবা হোৎনরকপদনা সেক্রেটরিয়েৎ ফাওবা য়ৌনা প্রোসেস তৌহনবা, অদুগা অচৌ-অশাং, ফম্নাইবশিংনা লম য়োনবদনা মশাগী কুশি-রাশিদা থবক তৌবা অসীদি য়াবা ঙম্লোই। মীচম মীয়াম্না লাল্লুবদনা অহকপা চৈরাক পীবা অদুগা মতীক-ময়ায় চেনবা, সঙ্গ লৈবা, ঈনাক খুনবশিংনা লূপা ক্রোর ক্রোরনা খূজীং ওইদুনা নমথাক তৌদুনা খুন্নাই অসীগী মীয়াম মাঙহনবদনা খঙশীন- উশিন্নদনা নমশীন্দুনা থম্বগী চৎনবী অসী মূত্থৎফম থোকপনি হায়খি। লৈঙাক্না অচান- মীরায় নাইদনা থবক পায়খৎলবদি চাওখৎপা লমদম অমা ওইগনি হায়না তোম্বনা মখাতানা ফোঙদোকখি।লৈঙাক্না ধর্মা কায়দনা, অচান- মীরায় নাইদনা থবক পায়খৎপীয়ু।তম্পাকখক্ত দা আইন চৎনরগা চীঙদনা আইন লৈতবগুম, অকনবনা অচূম্বা শকপগী চৎনবী অমা লৈরিবসি সেন্টর লৈঙাক্না ধর্মা য়াওদনা, মীচঙ মীখায় নাইবা থৌশিল চত্থবদগীনি।  ধর্মা কায়রবদি মীনসু য়ারক্লোই অদুগা ঈশ্বরনসু শাউরক্কনি হায়খি।