সোসিও-পোলিটিকেল এনালিষ্ট পি সোনামনি লৈখিদবদা লূপ কয়ানা অৱাবা ফোঙদোক্নরক্লি

মনিপুরগী শক্নায়রবা সোসিয়েল এক্টিভিষ্ট অমসুং সোসিও-পোলিটিকেল কম্মেন্টেটর এন্দ এনালিষ্ট পোৎশঙবম সোনামনি মতম শাংনা লাঙ্গোলদা লৈরিবা শিজ হোস্পিটালস এন্দ রিছার্স ইন্সটিট্যুটকি আই সি য়ুদা লায়কন্নদুনা লৈরম্লবা মতূঙদা হৌখিবা জুলাই ১৯,থাংজা নুমীৎকি নুমিদাংৱাইরম পূঙ ৪.১০ রোম চৎপদা খঙহৌদনা লৈখিদ্রে। মহাক রিটায়র্দ আই পি এস ওফিসার অমনি। মহাক্কি পুন্সিদা পব্লিক সার্বিস তৌরকখিবগী গ্যান-লৌশিং কয়াদু খুন্নাই অসীগী মীয়ামগী কান্নগদবা মওংদা পাওতাক ওইনা লমদম অসীগী ফোরম কয়াদা শন্দোক্না তাকপী তম্বীদুনা অফবা, চাওখৎপা লমদম অমা ওইননবা য়াম্না কন্না হোৎনরম্মী।

মীয়ামগী মীৎ-নাকোং ওইগদবা, তুংগী মীৎয়েং শান্না উবা ঙম্বা মনিপুর ঈমাগী তাঙলবা মপারি পি সোনামনিনা লৈখিদবদা কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) না থম্মোয় শোক্না অৱাবা ফোঙদোরকখ্রে। মহাক্না খঙহৌদনা লৈখিদবা অসী ঈরমদম অসীগী মতম শাংনা মেনখৎপা ঙম্লরোইদবা অচৌবা মাঙজবা অমনি হায়রকপগা লোয়ননা মহাক কায়নবদা  অৱাবা, নুঙাইতবা মৈচাক পুদুনা লৈহৌরবা লমদম অসীগী মীয়াম, মহাক্কি ঈমূঙ-মনূঙগী অমদি মরী-মতা, মরূপ-মপাঙশিংনা মায়োক্ন রিবা থম্মোয়গী মৈচাক কোকোমিসু পুবদা শরুক য়াজরি হায়না ফোঙদোরক্লি।

পাবূঙ অসীনা মতম চাদনা লৈখিদবা অসী ঐখোয় পূম্নমক্কিদি অমূক হন্না মেন্সিনবদা ৱারগদবা অৱাৎপা অমনি, মহাক্কি ঈমূঙ- মনূঙনা মায়োক্নরিবা অৱাবদা থম্মোয় শেংনা শরুক য়াজরি লোয়ননা লৈখিদ্রবা পাবূঙগী ৱাখল্লোন অমসুং পান্দম খূদূং ইনগনি হায়না আরম্বাই তেঙ্গোলগী মায়কৈদগী ফোঙদোরক্লি। ওল মনিপুর মৈতৈ-পাঙল দেভলপমেন্ট ওরগনাইজেসন ( অম্মদো) গী মায়কৈদগীসু লুচিংবা অসীনা লৈখিদবদা থম্মোয় শোক্না অৱাবা ফোঙদোরক্লি।