লৈঙাক্কা সূ তৌনরিবা চিন-কুকি-জো কাঙলূপকি মিলিটেন্টশিংনা নাগা তাবা এরিয়াশিং ফাওদুনা টাইগর রোদ, জর্মন রোদ হায়বনচিংবা লম্বীশিং নৌনা শেমগৎলক্নবা হোৎনরক্লিবা অসিদা নাগা মীয়ামদা পাউ অমত্তা মাঙজৌননা পীরমদবা, কুশি-রাশি তৌদুনা, মনীঙ তম্না তৌনিংবতা তৌরকপা, নাগাশিংগী এরিয়াদা কুকি মিলিটেন্টশিংনা মশীঙ থীঙমদ্রবা বঙ্করশিং শাজিল্লকপা অমসুং খূৎশু-খূৎলায় কয়ামরুম পৈশিন্দুনা থম্লকপা অসীনা নাগা মীয়ামগী মহৌশাগী পুন্সিদা চাউনা শীঙনরক্লি।
কুকিশিংনা পোপ্পি পাম্বীশিং পাক-সন্না থাজিল্লকপদগী মনিপুরদা দ্রগকি ঈচাও মায়োক্নরকপা য়াবগী অকিবা লৈরক্লি। তুংদা হৌরক্লিবা নহারোল কয়াগী পুন্সি নিষাগী ঈপাক্তা লূপখিদুনা হৌগৎপা ঙম্ল রোইদবা খুন্নাই অমা ওইহন্নবা কুকিশিংনা লমদমসিদা হোৎনরক্লি হায়না চেরোল অমদা ফুট হীলস নাগা কোর্দিনেসন কম্মিটি ( এফ এন সি সি) না ফোঙদোরক্লি। কুকিশিংনা ওইহল্লক্লিবা অকিবা কয়া অসী মতম চানা থিংহৌবা তঙায়ফদবনি হায়না চেরোল অসিদা এফ এন সি সি না ফোঙদোরক্লি।
কুকিশিংগী মথক্তা ঙসী হৌখিবা অহীঙ নোংয়াইদগী অথীংবা থমদুনা নাগাশিংনা খুন্দারিবা মফমশিং ঙাক শেন্ননবা থবক পায়খৎলক্লিবসিদা মতেং পাংবিয়ু হায়না কম্মিটি অসীনা তোঙান-তোঙানবা নাগা লূপশিংদা চেরোলশিং পীদুনা হায়জখ্রে। জেটিসি, চিরূ য়ূনিয়ন, সি এন পি ও, এন পি ও সেনাপটি নচিংবা লূপশিংগী প্রসিদেন্ট পূম্নমক্তা চেরোলশিং পীদুনা খোঙজঙ অসীদা মতেং পাংশিন্দুনা মপূঙ ফাহন্ননবা হায়জখিবনি।