বফর জোন চৎনখ্রে হায়বসি হৌজিকফাওবা খঙদ্রিব্রা হংলিবা মীওইশিং অসিনা মীয়াম্বু লান্না লমজীঙনবা হোৎনরি: দা. বিমোল অকোয়জম

ইন্দিয়া লৈঙাক অমসুং মনিপুর লৈঙাক্না লিগেল সেঙ্কসন পীদ্রবসু লমদম অসীদা লৈরিবা য়েলহৌমীশিংনা মশাগী মরমদমদা চৎনীঙবা মফমদা চৎচবদা বফর জোন হায়বা মিং অমগী মখাদা অথীংবা থম্লিবসি আইনগী মায়োক্তনি। মসিনা লৈবাক  অসীগী সিটিজনশিংদা ইন্দিয়ন কন্সটিট্যুসন্না মসীগী আর্টিকল ১৯ গী মখাদা পীরিবা ফ্রীদম ওফ মূভমেন্ট অদুবু খোঙ্গোয়নবনি হায়না মনিপুর গী ইন্নর পারলিয়ামেন্টরি কন্সটিট্যুয়েন্সিগী লোক সভা এম পি দা. অঙোমচা বিমোল অকোয়জমনা য়াম্না কন্না পেন্দবা ফোঙদোকখ্রে।

ঙরাং ইম্ফালগী কৈশামথোংদা লৈবা মশাগী য়ূমদা পাঙথোকখিবা পাউমীশিংগা উনখিবা থৌরম অমদা মহাক্না ৱাফম অসী ফোঙদোকখিবনি। মহাক্না হন্দক বিষ্ণুপুর দিষ্ট্রিক্ট কি মনুঙচন্না লৈরিবা ফৌগাকচাউ ইখায় মখা লৈকায়দা লৈবা কৈথেলদা চঙননবা হোৎনবদা মফম অদু বফর জোন্নি হায়দুনা অথীংবা থম্লমখি। মহাক মফম অদূদা চঙবা য়াননবা সেক্যুরিটি কোভরেজ পীবীয়ু হায়না মফমদুদা লৈরম্বা সেক্যুরিটি ফোর্স কি মকোকথোংবা ওফিসিয়েলশিংদা য়াম্না কন্না তক্নরবসু মখোয়দা মদূগী অথোরিটি অমত্তা পীদে হায়দুনা চঙবা য়াহনখিদে হায়না বিমোলনা য়াম্না পেন্দনা পাউমীশিংদা ফোঙদোকখি।

কনাগুম্বা মীওই খরনা মফম অদুদা মহাক করীগী চৎলুরিবনো, হান্নদগী বফর জোন লৈরে হায়বসি খঙদব্রা হায়না করেম কথায়নবা য়াওরক্লিবসি মীচম মীয়াম্বু লান্না লমজীঙনবা হোৎনবনি। মখোয়শিং অদূ লৈবাক্কি অমসুং খুনাই অসীগী য়েক্নবনি, ইন্দিয়ানা মনিপুরবু মচেৎ তানা থুগাইনবা হোৎনরিবা অসিদা মীওই খূজোক খরা অসীনা মতেং পাংশিনবগী থবক চত্থরক্লি হায়না এম পিনা অকনবা ৱাফম থমখি।