লৌমীশিংনা মশাগী রিস্ক লৌজরগা লৌফমশিংদা লৌ উননবা ট্রেক্টর শীজিন্নরগা লৌ শুদুনা লৈরিঙৈদা অথীংবা পীরকপা কন্দেম তৌই: কোকোমি ফার্মর্স ৱিং

হৌখিবা কুমশিং ২০২৩ গী মে অহুমদগী ঙসীফাওবা চহী অনী হেল্লক্লবা, চিন-কুকি নার্কো টেরোরিষ্টশিংনা চত্থরক্লিবা হীঙশাগী ঈরাঙ অসীদা চীঙগা তাইননা লৈরিবা তম্পাক্কি এরিয়াশিংদা লৈরিবা লৌফমশিংদা মৈতৈ ফূরূপকি লৌমীশিংনা চঙদুনা লৌ উননবা হোৎনবদা কুকি নার্কো-টেরোরিষ্টশিংনা লান্দাশিন্দুনা লৌমীশিং হাৎপা অমসুং নোংমৈনা কাপ্তুনা মীওই কয়ামরুম শোকহনখিবগী পেন্নদবা অমসুং খোয়রাং খোয়শাওনবা কয়াগী চৈরক্তা হৌজিক অমুক ইন্দিয়ান আর্মীনা পার্মিসন য়াওদে হায়দুনা হন্দক নোংমা-নীনীগী মমাঙদসু লৌমীশিংনা মশাগী রিস্ক লৌজরগা লৌফমশিংদা ট্রেক্টর শীজিন্নরগা লৌ উননবা খোইবগী থবক চত্থবদা অথীংবা পীরকখিবা থৌওং অসী অকনবা মওংদা কন্দেম তৌই হায়না কো-ওর্দিনেটিং কম্মিটি ওন মনিপুর ইন্টিগ্ৰিটি (কোকোমি) গী ফারমর্স ৱিং থীনূংগৈনা ফোঙদোরক্লি।

থীনুঙ্গৈগী লৌমীশিংনা মশাগী লৌফমশিংদা লৌ উননবা হোৎনবদা অথিংবা থম্লকখি হায়রিবা মফমদুদা কোকোমি ফারমর্স ৱিংগী কনভিনর না লুচিংবা ওফিসিয়েল টিম অমনা চত্থখিবা য়েংশিন-খোঙচত্তা শরুক য়াখিবা ৱিং অসীগী কো- কনভিনর কোন্থৌজম থোইবা মীতৈনা ফোঙদোকখিবা মতূঙ ইন্না, ঈশাগী ঈরমদমদা, মরোল থোক্ট্রবা, মনা পঙলবা অমদি দাইত্য খঙনা মীয়ামগী থবক- থৌরম অমত্তা পায়খৎচবা ঙমদ্রবা লৈঙাক অসীনা বফর জোন কয়ামরুম থমজিন্দুনা মৈতৈনা মশাগী লৌফমশিংদা লৌ উবা ঙমহন্দবদগী হৌখিবা চহী অনী হেন্না লমদমসিদা পোত্থোক-চাত্থোক পুথোকপা ঙমহন্দনা লৈরক্লিবা অসী য়াম্না লাইবক থীবনি। মৈতৈশিংবুদি মশাগী লৌফমশিংদা লৌ উবা ঙমহন্দনা থম্লগা লৌতায়নবদা লৈরিবা চীঙমীশিংগী লৌফমশিংদি চহী খূদীঙগী লৌ পানবা য়াহল্লিবা লৈঙাক্কি থৌরাং য়াবা ঙম্লরোই, খাঙবা ঙম্বগী মতমদু হেনখিগদৌরে হায়খি।

হন্দক্কি কুমগী ওইনা তম্পাক্কি লৌফমশিংদা লৌ পানবা ঙমহন্নবা থৌরাং লৈঙাক অসীনা পায়খত্রবদি কোকোমিনা মশাগী রিস্ক লৌজরগা লৌফমশিংদা লৌ পানবা ঙম্ননবা থৌরাং লৌখৎলগনি। মদুদা থোক্লকপা অফ-ফত্তগী তেকচাক লৈঙাক অসীনা পুজগদবনা হায়খি।