হান্নগী মনিপুর চিফ মিনিষ্টর নোংথোম্বম বিরেন্না চহী অসীগী হৌখিবা ফেব্রুয়ারি ৯ দা ফম থাদোকখ্রবা মতূঙ লৈঙাক্কি লুচিংবা অমা পুথোকপা ঙমদনা লৈরকখিবা চৈরক্তা থা অদূমক্কি ১৩ দা ইন্দিয়াগী প্রসিদেন্ট দ্রৌপদি মুরমুনা মনিপুরদা প্রসিদেন্ট রুল থম্লে হায়না লাউথোরকখিবগা লোয়ননা হৌজিক ষ্টেট অসীদা প্রসিদেন্ট রুল চল্লাইদুনা লৈরি।
থা অনীরোম হেন্না অসীগুম্বা মীয়ামগী লৈঙাক লৈরকখিদ্রবা মতূঙদা সেন্টরগী লুচিংবশিংনা হন্দক ইখঙ খঙহৌদনা কৌরকপদগী ষ্টেট লেজিসলেটিব এসেমব্লিগী স্পিকর থোকচোম সত্যবর্তা ঙরাং ন্যু দিল্লিগীদমক ইম্ফাল থাদোকখ্রে। ঙরাং নুমিৎয়ুংবা মতূঙদা মহাক কম্মর্সিয়েল ফ্লাইট অমদা তোংদুনা দিল্লি পাংখিবনি। মহাক করি মরমগী কৌরকখিবনো হায়বা হৌজিকমক্কি ওইনা চপচানা খঙনদ্রবসু মনিপুরদা তঙদূ-লৈতাদবা রাজনিতিগী শক্তম মতম শাংনা মায়োক্নরগা লৈরকপা অমসুং মীয়ামগী লৈঙাক অমা থম্ননবগী ৱাফমশিং খন্ন- নৈননবা কৌরকপা ওইগনি হায়বগী থাজবা লৈরি।
হন্দক্কি খোঙচৎ অসীদা মনিপুরগী মথঙগী চিফ মিনিষ্টর কনানা ওইরগনি হায়বদু খঙলবা য়াই হায়রি। কুমশিং ২০২৩ গী মে অহুমদগী মনিপুরদা লৈরকখিবা হীঙশাগী ঈরাং অসী ঙসীদি তপ্না-তপ্না নেমথরকপগা লোয়ননা মহৌশাগী শক্তম হঞ্জিল্লক্লিবনি।