মমাঙ থা ফেব্রুয়ারি ১৮ দা মনিপুর লেজিসলেটিভ এসেমব্লিগী স্পিকর থোকচোম সত্যব্রত্তদা ফোন কোল তৌশিল্লক্লগা, চিফ মিনিষ্টরগী ফমথোল থিন্দোকপিরক্কে লূপা ক্রোর মরি পীয়ূ, য়ুনিয়ন হোম মিনিষ্টর অমিট সাহাগী মচানুপা জয় সিংহনি হায়না শেমজিন-শাজিন্দুনা অচৌবা শেলগী দিমান্দ তৌরকপদা চেন্নবা নহা অহুম হরিদ্বার পুলিসনা দিল্লিগী তোঙান তোঙানবা মফমশিংদগী ফাগৎখিবগা লোয়ননা মনিপুর পুলিসনা মখোয়গী মথক্তা লৌখৎখিবা এফ আই আর কেস অনীগা মরী লৈননা মখোয় অহুম ঙরাং অয়ূক পূঙ ৮ তাবদা ধেরাদুনদগী দিল্লি ফাওরগা ইম্ফালদা পুরকখ্রে।
ইম্ফাল পুলিসকি সব- ইন্সপেক্টর ফারুখ শৈখনা লুচিংবা পুলিসকি টিম অমনা ধেরাদুনদগী ইম্ফাল এয়রপোর্ট ফাওবা লাক্লগা মফম অদুদগী মখাতানা ইম্ফাল পুলিশ ষ্টেসনফাওবা পুরকখিবনি। মখোয় অহুম্না অমিট সহাগী মচানুপা জয় সিংহনি হায়জিন্দুনা তোঙান তোঙানবা ষ্টেটশিংগী এম এল এ শিংদসু অচৌবা শেলগী দিমান্দ তৌরম্বদগী হৌখিবা ফেব্রুয়ারি ১৮ দা হরিদ্বার পুলিসনা মখোয়বু ফাগৎখিবনি।
পুলিসনা ফাগৎপা ঙমখ্রবা অহুম অদুদি অহানবদা, প্রিয়ান্সু পন্ট (১৯), অপোকপা বসন্ত বল্লভ পন্ট জি দি কোলোনি, ইষ্ট দিল্লি, অঅনিশুবা মীওই অদুনা গৌরভ নাথ (১৯) অপোকপা বহাদুর, সাপেরা বষ্টি, ঘরিয়াপুর, ইষ্ট দিল্লি অমসুং অহুমশুবা মীওই অদুনা উবেইস অহম্মদ (১৯) অপোকপা শাগির অহম্মদ নিধাউরি, ইটা দিষ্ট্রিক্ট, য়ু পি হায়রিবশিং অসিনি।