নরেন্দ্র মোদী মনিপুরদা চত্তুনা হীঙসাগী ঈরাং অসীগী ৱারোয়শিন পুরকউ হায়বা খোল্লাউনা নিনখ্রে

ইন্দিয়া ব্লোক মনিপুর য়ুনিটনা শীন্দুনা তোঙান তোঙানবা ইন্দিয়াগী লুচিংবশিং শরুক য়াদুনা দিল্লিদা লৈবা জন্টর মন্টরদা অকনবা খোঙজঙ চঙশীন্দুনা, হৌজিক মনিপুরদা থোক্লিবা হীংশাগী ঈরাঙ অসী লোইশিন্ননবা প্রাইম মিনিষ্টর নরেন্দ্র মোদী মনিপুরদা চৎকদবনি হায়না মীয়াম্না অকনবা খোল্লাউশিং লাউখ্রে।

মমাঙ থা নবেম্বরগী ২৯  দা মনিপুর প্রদেস কংগ্রেস কম্মিটিগী প্রসিদেন্ট কৈশাম মেঘচন্দ্রনা লুচিংবা ইন্দিয়া ব্লোক্কি মীহূৎ কাঙবূ অমা খোঙজঙ চঙশীল্লুননবা ন্যু দিল্লিগীদমক ইম্ফাল থাদোকখিবনি। থা অসীগী ৬তা খোঙজঙ চঙশীল্লুননবা হোৎনখ্রবসু পর্মিসন ফংখিদবনা খোঙজঙ চত্থদনা লৈরকখিবনি। পি এম ও দা চত্তুনা মেমোরেন্দম পীশীনবসু লৈখ্রবনি। থা অসীগী নিপান্দা দিল্লিগী মনিপুর ভাবন্দা ইন্দিয়া ব্লোক্কি মীহূৎ কাঙবূ অমা মীফম পাঙথোক্তুনা পার্মিসন ফংলবসু ফংদ্রবসু খোঙজঙ চঙশীন্ননবা  ৱারেপ লৌখিবনি।

মদূগী মতূংদা ইন্দিয়া ব্লোক মনিপুর য়ুনিটনা লুচিংদুনা ইন্দিয়া ব্লোক্কি মীহূৎ কয়ানা পূন্দুনা ঙরাং খোঙজঙ চঙশীনখিবনি। তামিল নাদুগী এম পি জোসিমানি, সি পি আইগী নেস্নেল জেনরেল সেক্রেটরি দি রাজা, আসামগী এম পি অমসুং দিপ্যুটি লিদর ওফ ওপ্পোজিসন গৌরব গোগোই, সি পি আই (এম) গী পোলিটব্যুরো মেম্বর প্রকাস কারট, আসামগী এম পি রকিবুল হুসেইন, সি পি আই (এম এল) গী এম পি রাজা রাম সিংহ কুসৱালা, নাগালেন্দগী পি সি সি প্রসিদেন্ট এম পি সুপোন মেরেন জামিরনচিংবা শক্নায়রবা মীওই কয়ানা ৱাফমশিং ফোঙদোক্তুনা প্রাইম মিনিষ্টর মনিপুরদা চত্তুনা হীঙসাগী ঈরাং অসীগী ৱারোয়শিন পুরক্কদবনি হায়না অকনবা ৱাফমশিং তকশীনখি।