ইম্ফাল নোংচূপ পানাগী মনূঙ চন্না লৈরিবা য়ূম্নাম হুইদ্রোমদা চৎলিবা থা অসীগী ২৭ তগী চত্থরকখিবা নেস্নেল থাঙ- টা টেক্নিকেল ওফিসিয়েল অমসুং কোচশিংগী ওইবা ট্রেনিং প্রোগ্রাম-২০২৫ ঙরাঙ মায় পাক্না লোইশিনখিবগা লোয়ননা ৯২ শুবা থাঙ- টা ফেষ্টিবেলসু ঙরাং লোইশিনখ্রে।
থাঙ- টা রিভাইবেল ডে হায়না মিংথোন্দুনা চহী খূদীঙগী পাঙথোকপা থৌরম অদুগী ৯২ রক শুবা ইদিসন হন্দক পাঙথোকখিবনি। থৌরমদুদা আসামগী করিমগঞ্জ দিষ্ট্রিক্ট থাঙ-টা এসোসিয়েসনগী এদভাইজর অমসুং সোসিয়েল এক্টিভিষ্ট মোহম্মদ অব্দুল কাদির, ৱারল্ড থাঙ-টা ফেদরেসনগী প্রসিদেন্ট হুইদ্রোম প্রেমকুমার, পাহুলাসি গী প্রিন্সিপাল অমসুং ষ্টেট কালা একাদেমি এৱার্দি মোইরাংথেম রাজেন অমসুং অতৈ শক্নায়রবা মীওই কয়ামরুম শরুক য়াখি।