মনিপুরদা থেংনরিবা মৈগী অৱাৎপা কয়া অসী মেনখৎনবা মেগাৱাট ৫০ পুথোক্কদবা সোলর প্লান্ট অনী লিংখৎলগনি হায়না পৱার মিনিষ্টর থোঙাম বিশ্বজিৎনা ফোঙদোকখ্রে। মনিপুর ষ্টেট পৱার দিষ্ট্রিব্যুসন কম্পেনি লিমিটেড ( এম এস পি দি সি এল) অমসুং গরেন্টি গ্লোবেল অনীনা পূন্না শীন্দুনা নোরথ এ ও সিদা লৈবা হোটেল ইম্ফালগী সঙাই হোলদা পাঙথোকপা ব্যুরো ওফ ইনর্জি, ইফিসিয়েন্সিগী লোঞ্চ তৌখিবা থৌরমদা অথোইবা মীথূংলেনগী ৱারোলদা মিনিষ্টরনা ৱাফম অসী ফোঙদোকখিবনি।
ইন্দিয়াগী অৱাং নোংপোক্তা লৈরিবা ষ্টেটশিংগী মনূংদা মনিপুর লৈঙাক্না মীয়ামদা লূপা ক্রোর ৩৭১ সবসিদি পীদূনা খ্বায়দগী হন্থবা, অনেম্বা মমলদা মৈ ফংহল্লি। মসিগীসু মথক্তা মতম মতমগী মতূং ইন্না অহেনবা মৈগী দরকার ওইরকপশিং পীবা ঙম্ননবা অনৌবা, এদভান্স টেক্নোলোজি শীজিন্নদুনা মহৌশাগী খল কায়হন্দনা মৈ পুথোক্ননবা থৌরাং কয়াসু পায়খৎলি হায়খি। মীয়াম্নসু য়ারিবমখৈ মৈ অরেম্বদা মাঙহন্দনবা ৱাট হন্থবা মখলগী ইলেক্ট্রিক এপ্লায়েন্স শীজিন্নবিয়ু হায়না মিনিষ্টরনা মীয়ামদা আপিল তৌখি।