ভিল্লেজ চিফ খনবগী মতাঙদা সেন্টরনা থোকখিবা গেজেট নোটিফিকেসন লোন্না শেমদোক্লম্বা থেংনরে, হান্নগী চিফ মিনিষ্টরনা মসীগী মতাংদা গভর্নরদা ৱাকৎখ্রে

মনিপুরগী চীঙদা খুন্দারিবা ট্রাইবেলশিংগী ভিল্লেজ চিফশিং খনবগী মতাঙদা সেন্টরনা মমাঙদা থোকখিবা গেজেট নোটিফিকেসন শেমদোক্তুনা লৈরম্বা থেংনরে। অসূম্না হুরান- লোন্না তৌদুনা সেন্টরগী গেজেট নোটিফিকেসন শেমদোক্লমখিবা অসীগী মতূঙদা মনিপুরদা অনৌবা খুল কয়ামরুম চীঙগী লমশিংদা শন্দোরক্লম্বা য়াবগী অকিবা লৈরি। সেন্টরগী গেজেট নোটিফিকেসন শেমদোক্লমখিবা অসীগী মতাংদা এনক্বারি কম্মিটি অমা অথূবদা শেমদুনা থিগৎহনবগা লোয়ননা মরাল লৈবশিং কনা কনানো হায়বদু খঙদোক্নবা থবক লৌখৎপীয়ু হায়না মনিপুরগী হান্নগী চিফ মিনিষ্টর অমসুং হৈঙাঙ কেন্দ্রগী এম এল এ নোংথোম্বম বিরেন্না ঙরাং গভর্নর অজয় কুমার ভাল্লাগা হকথেঙননা উনদুনা অইবা ৱাকৎ চেরোল অমা পীশীনখ্রে।
মহাক্কি অইবা ৱাকৎ চেরোল অদুদা মরূওইনা পনখিবা ৱারোলশিংদি, সেন্টর লৈঙাক্কি গেজেট নোটিফিকেসনগী ক্লোজ ৯ গী মতূঙ ইন্না, “দি এপ্পোইন্টমেন্ট ওফ সক্সেসন ওফ ভিল্লেজ চিফস ওর হেদমেন”, হায়না য়াওরি। অদূম ওইনমক কুমশিং ১৯৭২ দা মনিপুর লেজিসলেটিব এসেমব্লিগী হীল এরিয়া কম্মিটিনা ফোঙখিবা নোটিফিকেসন্দা, ” দি এপ্পোইন্টমেন্ট ওর সক্সেসন ওফ চিফ ওর হেদমেন “, হায়না শেমদোক্লম্বা থেংনরকপনি হায়রি।
মসীনা চীঙগী লমশিংদা হৌজিক অনৌবা খুল কয়ামরুম শেমগৎলম্বা য়াবগী চিংনবা চাউনা লৈরে। কনানা ভিল্লেজশিংগী অশেংবা মপূ ওইরিবগে হায়বসু খঙবা ঙম্নরক্তবগী থাক্তা লৈরে। মনিপুরদা খুল কয়া নৌনা চোংথোরকপদগী মীয়াম অমসুং লৈঙাক্কি মফমদা খুদোংচাদবা কয়ামরুম মায়াক্নরিবনি হায়খি।
মরম অসিনা, অশোয়বসি কনাগী অয়াবা লৌরগা চত্থখিবনো হায়বদু থিদোক্তুনা মরাল লৈবশিং অকনবা দন্দি পীবা য়াওনা অশোয়বশিং অদূ অমূক হন্না চুমথোক্ননবা অথূবা খোঙথাঙ লৌখৎপিয়ু হায়না বিরেন্না গভর্নরদা তকশীনখি।