অর্বান লোকেল বোদী ইলেক্সন অথূবদা পাঙথোক্লগনি:চিফ মিনিষ্টর

মনিপুরদা মতম শাংনা য়ৈথোক্তুনা লাকখ্রবা ম্যুনিসিপাল কোর্পোরেসন গী য়াওনা নগর পঞ্চায়েৎনচিংবা অর্বান লোকেল বোদীশিংগী মীখল অথূবা মতমদা পাঙথোক্নবা তৌরগনি হায়না চিফ মিনিষ্টর য়ূম্নাম খেমচান্দনা ফোঙদোকখ্রে। ঙরাং ১২ শুবা মনিপুর লেজিসলেটিব এসেমব্লিগী তরেৎশুবা মীফম লোইশিনবা নুমিত্তা তোঙান তোঙানবা দিপার্টমেন্টশিংগী দিমান্দ ফোর গ্ৰান্টস কি দিসকসন নৈনরকপদা চিফ মিনিষ্টরনা ৱাফম অসী ফোঙদোকখিবনি।বদজেট সেসন অদূগী ঙরাং লোইশিনবা নুমিত্তা মনিপুর এপ্রোপ্রিয়েসন বিল নম্বর-টু পাস তৌখি।তরেৎশুবা সেসন অদূ হৌখিবা মার্চ ৯ দগী, অকোনবা তাঙ্কক্কি ওইনা চত্থরকখিবনি।

ঙরাং সেসনগী অরোয়বা নুমিত্তা তোঙান তোঙানবা দিপার্টমেন্ট তরেৎকি দিস্কসন এন্দ ভোটিং ফোর দিমান্দস ফোর গ্ৰান্টসকি মতাঙদা খন্ন-নৈনখি। ওপ্পোজিসন মেম্বরশিং -কে মেঘচন্দ্র, টি ঐচ লোকেশ্বর,সুর্জকুমার ওক্রম্নচিংবা এম এল এশিংনা কট-মোসনশিং পুখত্তুনা ৱাফম কয়ামরুম থমখি। হান্নগী চিফ মিনিষ্টর ওক্রম ইবোবিনসু ঙসীগী লৈঙাক্না পায়খৎলক্লিবা চাওখৎ-থৌরাংশিংগা মরী লৈননা সজেসন কয়া পীরদুনা পূঙ অমরোম ৱাফম কয়া থমখি। ওপ্পোজিসনগী কৈশাম মেঘচন্দ্রনা দিমান্দ দিস্কসনগা মরী লৈননা ৱা ঙাঙলিঙৈ চৈরক্তা য়ুহার হারে হায়বা ৱাফম ফোঙদোরকপদগী স্পিকরনা মিনিট মঙা মীফম য়ৈথোকখি।

মেম্বরশিংনা পুখৎলকখিবা ৱাফমশিং তারবা মতূঙদা চিফ মিনিষ্টর য়ূম্নাম খেমচান্দনা অথূবা মতমদা অর্বান লোকেল বোদীশিংগী মীখল পাঙথোক্লগনি, ইলেক্সন কম্মিসন ওফ ইন্দিয়াগী ৱাফম অমা তারবা মতূঙদা মীখলগী মতম লেপ্লগনি হায়খি।খন্ন-নৈনবা লোইরবা মতুংদা স্পিকরনা তরেৎশুবা সেসন অদূ মতম কক্তনা য়ৈথোক্লে হায়না লাউথোকখি।