ট্রোংলাউবি,জিরিবামদা কুকি মিলিটেন্টশিংনা অঙাং হাৎখিবগী মায়োক্তা অঙাঙশিংনা রেল্লি চৎখ্রে

হৌখিবা কুমশিং ২০২৩ গী মে অহূমদগী হৌরকখিবা মৈতৈ-কুকি কম্যুনিটি অনীগী হাৎনা-শুনবগী ঈরাং মরক্তা ঙসীফাওবদা কুকি মিলিটেন্টশিংনা মৈতৈ ফূরূপকি পোকপদা ঙায়রিবা অঙাঙ ফাওবা য়াওনা চহী নৌরিবা অঙাং কয়ামরুম মখল মখা কয়াগী শক্তি লৈরবা নোংমৈ অমদি অতৈ মখলগী খূৎলাইশিং শীজিন্নদুনা মিনুংশি অমত্তা য়াওদনা, য়াম্না তমথীনা ওৎ-নৈরবা মতূঙদা হাৎখিবা থৌওংশিং অদূবু কন্না য়ানিংদবা উৎলদুনা ঙরাং অঙাংশিংনা লম্বীদা থোক্নরক্তুনা রেল্লি চৎখ্রে।
তুংগী য়ূম্বীরেল ওইরক্কদৌরিবা,করিশু খঙজদ্রিবা অমসুং মরাল লৈজদবা অঙাঙদা খূৎ থাদুনা মীহাৎ থীনা হাৎপা, ওৎপা -নৈবগী থৌওংশিং লৈঙাক অসীনা খূদক্তা থিংবিয়ু, তুংগী মীরোল কনবিয়ু, ঐখোয়দি করিমত্তা খঙদ্রিবা, মরাল লৈতবা ঙাক্তনি হায়বনচিংবা প্লেকার্দশিংগা লোয়ননা খোল্লাউ কয়া লাউদুনা অঙাঙশিং অদূনা রেল্লি চৎখিবনি।
জিরিবামদা অঙাঙ অহূম অমদি মমা অহুম, পূন্না মরাল লৈজদবা মীওই তরূক তমথীনা ওৎ-নৈদুনা হাৎখিবা অমসুং চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মোইরাং পুলিস ষ্টেসনগী মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশীন্দূনা নৌরিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদূবু অঙাঙশিং অদূনা অকনবা মওংদা কন্দেম তৌখি। মিলিটেন্টশিংগী খূত্তা লৈখিদ্রবা অঙাঙশিং অদূগী অচূম্বা ৱায়েল ফংহনবিয়ু অমসুং করিসু মরাল লৈজদবা, তাইবংগী লীচৎ করিনো খঙজদ্রিবা নৌরিবা থৱায়শিং অসীদা অৱাবা পীবীগনু, তুংগী মীরোল য়োকখৎপিয়ু হায়বা ৱাফম, রেল্লি অদুদা শরূক য়াখিবী সাপম তেঞ্জি কৌবী নৌরিবি নূপীমচা অমনা ফোঙদোকখি।