বফর জোনগী এরিয়াশিংদা সেক্যুরিটিনা ঙাক্লগা লৌ লোকপগী থবক হৌখ্রে

মনিপুরদা হৌজিক মায়োক্নরগা লৈরিবা কুকি -মৈতৈ অনীগী কনফ্লিক্ট অসীদা চুরাচান্দপুর অমসুং বিষ্ণুপুর দিষ্ট্রিক্টকি লোন্নবা মফমশিংদা খায়দোক্তুনা থম্লিবা বফর জোন হায়না খঙনরিবা মফমশিং অসীদা কাঙলূপ অনীগী মীওইশিং নাকল অমনা অমগী এরিয়া ৱাংমা লান্না চঙশীনবা য়াহন্দনা থম্লি। মনিপুর ষ্টেট অসীমক্তদা লৈরিবা মনিপুরিশিংনা মশাগী লমখৈ মনূঙদা মনীঙ তম্না চৎথোক চৎশীন তৌনবা য়াদ্রিবসি সেন্টর লৈঙাক্না অতম্ননা শীনবা, মনিপুর মচেৎ তাহন্ননবা রাজনিটিগী অরোনবা থৌরাং অমনি হায়না মায়কৈ কয়াদগী মীয়াম অমদি পোলিটিকেল এনালিষ্টশিংনা ফোঙদোক্নবসু লৈরিবনি।

চৈরকশিদা,হৌখিবা ওক্তোবর ২৪ দা বিষ্ণুপুর হেদক্বার্টরদা লৈবা মিনি সেক্রেটরিয়েট কমপ্লেক্সতা লৈবা কনফরেন্স হোলদা দিষ্ট্রিক্ট অসীগী দিপ্যুটি কম্মিস্নার পুজা এলাংবম্না চ্যের লৌদুনা,মরী লৈনবা এসপি,এসদিপিও,ওসি অমদি অতৈ সেক্যুরিটিগী মকোক থোংবশিংনা শরুক য়াদুনা সেক্যুরিটি রিভ্যু মীটিং অমা পাঙথোকখ্রে।মীফম অদুনা হৌজিক চুরাচান্দপুর অমসুং বিষ্ণুপুর দিষ্ট্রিক্টকি লোন্নবাঈমফমশিংদা লৈরিবা বফর জোন হায়না খঙনরিবা মফমশিং অমসুং অকোয়বদা লৈরিবা লৌফমশিংদা লৌ লোকপা য়ারক্লবসু চঙবা ঙম্নদবা মরম্না লৌ খাওবা,য়ৈবগী থবক চত্থবা ঙমদনা লৈরিবা লৌমীশিংনা অশোয় -অঙাম য়াওদনা থবক শূজবা ঙমহন্নবগীদমক সেক্যুরিটি ফোর্সনা ঙাক শেলহন্নবা থবক লৌখৎখ্রে।

মসীগী মখা তারকপা খোঙথাঙ ওইনা হৌজিক লৌমী মীয়াম্না মশা -মশাগী লৌফমশিংদা লৌ খাওবা অমসুং য়ৈবগী থবকশিং ৱার ফুট্টিংদা পায়খৎনরক্লি।নুংতিগী অয়ূক পূঙ ৬.৩০ দগী নুংথিল পূঙ ৪ ফাওবা লৌমীশিং থবক শূগনি অদূগা সেক্যুরিটি ফোর্সকি পার্সনেলশিংনা মখোয়বু ঙাক -শেনগদবনি হায়রি।লৌ লোকপগী থবক -থৌরমশিং চৎলিবা নবেম্বর থা অসীগী অরোয়বা চয়োল  ফাওবগী মনূঙদা লোইশিলহন্নবা দি সিনা মরী লৈনবশিংদা খঙহনখি।