টাৱাং ইন্টর্নেস্নেল মরাথোন পাঙথোক্ননবা শেম-শাবা পূম্লোই লোইরে

দি ক্বিন ওফ হায়- ওল্টিচুদ রন্স হায়রগা খঙনরিবা টাৱাং ইন্টর্নেস্নেল মরাথোন পাঙথোক্ননবা শেম-শাবগী থবক থৌরম পূম্নমক লোইরে। মরাথোন অসী ইন্দিয়ান আর্মী অমসুং আরুনাচল গভর্ণমেন্ট অনীনা খূৎশম্নরগা পাঙথোক্কদবনি। ইন্টারন্যাশনেল মরাথোন অসী হন্দক্না অনিরকশুবা এদিসন্নি হায়রি।  লেন্দ ওফ দি রাইজিং সন হায়রগসু হৌজিক্কি মতমদা হেন্না মীয়াম্না খঙনরক্লবা আরুনাচল প্রদেসকি অৱাংবা অল্টিচিউডতা ফজরবা মহৌশাগী শক্তম্না পীক থন্না লৈতেংদুনা য়েংখি-য়েংখিবা মায়কৈদা মীৎফম হোংদোকখিবা ঙমদ্রবা টাৱাং সহরদা মরাথোন অসী লাক্লিবা ওক্তোবর ২৪ দা পাঙথোক্লগনি হায়রি। অদূঙৈ কুমশিং ১৯৪৫  গী ওক্তোবর ২৪ দা মালেমগী অপূনবা ফোরম অমা ওইরিবা দি য়ুনাইটেদ নেসন্স অসীবু ওফিসিয়েল ওইনা শেমখিবা নুমীৎকা অমত্তা ওইনা ফাংনদুনা পাঙথোক্কদৌরিবা মরাথোন অসী য়াম্না ৱাহন্থোক লৈবা প্রোগ্রাম অমসু ওইরি।

হৌখিবা কুমশিং ২০২৩ দা মরাথোন অসীগী ইনোগ্যুরেল ইদিসন মায় পাক্না পাঙথোকখিবগা লোয়ননা চৎলিবা চহী অসীগী জুলাই মরিদা আরুনাচল প্রদেসকি চিফ মিনিষ্টর পেমা খন্দুনা টাৱাং মরাথোন অসী চহী খূদীংগী ওক্তোবর ২৪ দা ইন্দিয়ান আর্মী অমসুং আরুনাচল গভর্ণমেন্ট অনীনা খূৎশম্নরগা পাঙথোক্লগনি লোয়ননা ইন্টর্নেস্নেল কেলেন্দর এন্নুয়েল ইভেন্ট অমা ওইনা পাঙথোকপা মরাথোন ওইরগনি হায়না লাউথোকখিবনি।

ইভেন্ট অসীগী পেট্রোন ওইনসু লৈরিবা চিফ মিনিষ্টর পেমা খন্দুনা কিলোমিটর ১০ গী ফুল মরাথোন অমসুং কিলোমিটর ৫ গী হাল্ফ মরাথোন পাঙথোকপদা মতেং ওইনবগীদমক লূপা ক্রোর ২গী ওইবা গ্ৰান্ট- ইন- এইদ পীরগনি হায়না লাউথোকখিবনি। রন্নর ৫,০০০ হেনবনা মরাথোন অসীদা শরূক য়াগদৌরিবনি। মরাথোন অসীগী প্রাইজ মনি ওইনা পূন্না লূপা লাখ ৬০ হেনবগী শেনফম থৌরাং তৌদুনা থমখ্রবনি হায়রি।