সঙাই ফেষ্টিভেল পাঙথোক্নবা হোৎনবা লৈঙাক্কি মায়োক্তা আই দি পিশিংগী খোঙজঙ হেঙ্গৎলক্লে,মৈ হৌনা শাউনরে

মনিপুর মীয়ামগী মায়োক্তা লৈরবা পি আর লৈঙাক অসীনা মীয়ামগী খোল্লাউ কয়া নাথৈদুনা থম্লগা মফম – মতম চাদনা চৎলিবা নবেম্বর থা অসীগী ২১ দগী সঙাই ফেষ্টিভেল পাঙথোকপা হৌখিবগী মায়োক্তা লমদমসিগী হীঙশাগী ঈরাংদা লাঞ্জেন্নদুনা রিলিফ কেম্পশিংদা লৈরিবা আই দি পিশিং না অকনবা মওংদা য়ানিংদবা ফোঙদোক্তুনা হৌখিবা নুমিৎ খরনিগী মতমদগী অকনবা প্রোটেষ্ট তৌদূনা লাক্লি। মসীগী শরুক অমা ওইনা থা অসীগী ২৩ গী অয়ূক অঙনবদা ইম্ফাল ৱেষ্ট দিস্ট্রিক্টকি লম্বোই খোংনাংখোংদা লৈরিবা মনিপুর ট্রেদ এন্দ এক্সপো সেন্টরদা হাংবা রিলিফ কেম্পতা লৈরিবা মশীঙ য়াম্লবা ইন্টর্নেল্লি দিসপ্লেস পার্সন (আই দি পি) শিংনা লম্বীদা থোক্লক্তুনা প্রোটেষ্ট রেল্লি অমা চৎখ্রে।নাকল অমরোমদনা,খূরায় মান্দপ য়ূম্ফমদা লৈরিবা আই দি পিশিং নসু হ্যুমেন চেন শেমদুনা সঙাই ফেষ্টিভেল মতম চাদনা পাঙথোকপগী মায়োক্তা অচৌবা ঈহৌ অমা হৌরকখ্রে।
ঐখোয়না সঙাই ফেষ্টিভেল বোয়কোট তৌই,আই দি পিশিং হান্না খুন্দা-লৈতাহল্লু,সঙাই ফেষ্টিভেল কোন্না পাঙথোকউ,ঐখোয়বু পল্লেপফম লৈতনা ঈশীংদা তাউদুনা লৈবা কান্নদ্রবা বোট্টল ওইনা উবিগনু হায়বা বেন্নরশিংগা লোয়ননা মনিপুর ট্রেদ এন্দ এক্সপো সেন্টরদা লৈরিবা আই দি পিশিংনা অকনবা খোল্লাউ কয়াসু লাউখি লোয়ননা বেন্নরশিংসু লোয়নরকখি।
মখোয়না সঙাই ফেষ্টিভেল পাঙথোক্লিবা ইম্ফালগী হপ্তা কাঙজৈবূং তম্না লাকপগী লম্বীদা মনিপুর পুলিসনা থৎতুনা থমখি।পুলিস অমসুং আই দি পিশিংগী মরক্তা উংখৎনবগী থৌদোক খরসু লৈখি।সঙাই ফেষ্টিভেল পাঙথোক্লবনিনা মনিপুর ঈরাং লৈত্রে হায়বগা পাঙ্খক্নি,অদূ ওইরবদি ঐখোয়বুসু য়ূমদা হঞ্জিলহল্লো হায়না কাংপোকপিদগী লাঞ্জেন্নরকখিবি মাইবম ইবেচা কৌবী অমনা ঐখোয়গী পাউমীশিংদা ফোঙদোরকখি।