প্রাইম মিনিষ্টর উননবা চিফ মিনিষ্টর ওফিস্তগী এপ্পোইন্টমেন্ট লৌননবা হোৎনগদবনি: ইবোবি

মনিপুরদা হৌজিক থোক্লিবা কাঙলূপকি ঈরাং অসীগী ৱারোয়শিন অমা পুরকপা হায়বসি লৈবাক অসীগী প্রাইম মিনিষ্টরনা পূকচেল শেংনা মীৎয়েং চঙদুনা হোৎনরবদি নূমীৎ নীনীগী মনূংদা লোইশিনবা ঙমগদবনি অদুবু সেন্টর লৈঙাক্কি হৌজিক লৈরিবা প্রাইম মিনিষ্টর অসীনা মনিপুরদা হৌজিক থোক্লিবা ঈরাং অসীগী মতাংদা করিগুম্বা ৱাফম অমত্তা ফোঙদোক্তনা, নাচুংদনা লৈথোক্লিবা অসীনা তাকপদি মনিপুরগী মীয়াম্বু থওই- ঊশীত্তে হায়বনি। মীয়ামগী অচূম্বা ঈহৌশিং অসী নমথদুনা থম্নবগীদমক হন্দক পুলিস ষ্টেসন তরূক্না কোনবা মফমশিংদা নৌহৌননা দিষ্টর্ব এরিয়া ষ্টেটস থমজিল্লকপগী থৌওং অসী  খ্বায়দগী লাইবক থীবনি। মালেমগী মীয়াম্না য়াদ্রবা আফস্পা কৌবা দ্রাকোনিয়ান লো অসী খূদক্তা হন্দোক্কদবনি অদুগা প্রাইম মিনিষ্টর উননবগীদমক দিল্লিদা হঞ্জিন-হঞ্জিন চত্তুনা নোঞ্জফম থোক্তে। মসিগীদমক্তদি মনিপুরগী এম এল এ ৬০ অসিনা চিফ মিনিষ্টরগী ওফিসনা পি এম ওদগী এপ্পোইন্টমেন্ট লৌফম থোকপনি হায়না কংগ্রেস লেজিসলেচর পার্টিগী লিদর অমসুং মনিপুরগী হান্নগী চিফ মিনিষ্টর ওক্রম ইবোবিনা অকনবা ৱাফম ফোঙদোকখ্রে।

ইম্ফালগি বাবুপারাদা লৈবা মহাক্কি ওফিসিয়েল ক্বার্টরদা পাঙথোকখিবা পাউমীশিংগা উনখিবা থৌরমদা মহাক্না ৱাফম অসী ফোঙদোকখিবনি। খূন্দ্রাকপম এ সিগী এম এল এ থোকচোম লোকেশ্বর, হান্নগী দিপ্যুটি চিফ মিনিষ্টর গাইখাঙম, এম পি বিমোল অকোয়জম, খাঙবোক এ সিগী এম এল এ ওক্রম সুর্জ কুমার, হান্নগী এম এল এ শিং- পাৎশোয় কেন্দ্রগী মিরাবাই, নম্বোলগী এন লোকেন, হৈরোক ওকেন্নচিংবসু থৌরমদুদা শরুক য়াখি।

থৌরমদুদা শরুক য়াখিবা খূন্দ্রাকপম কেন্দ্রগী এম এল এ থোকচোম লোকেশ্বরনা হায়, লৈঙাক অসীদা ওপ্পোজিসনগী এম এল এ শিংনা হৌজিক থোক্লিবা ঈরাং অসীগী মতাংদা ৱারোয়শিন অমা পুরকপা ঙম্ননবা সজেসন কয়া পীদুনা ঙসীফাওবা লাক্লি অদূবু ওপ্পোজিসন মৱা লৌদে হায়বা মতাগুম থোয়চৎ-ৱাংচৎনবগী মওংদা নাচুংদনা লৈথোকখিবদগী ঙসীগী লুরবা তাঞ্জাসি য়ৌশিনখিবনি। দিষ্টর্ব এরিয়া ষ্টেটস থমজিল্লগা মীয়ামগী অচূম্বা ঈহৌ নমথনবা হোৎনরিবা বি জে পি দব্বল ইঞ্জিনগী সাসন অসী মীয়াম্না পারা অমা তম্বিবগী মতমদু য়ৌরে হায়খি।