প্রাইম মিনিষ্টর হৌজিকমক্কি ওইনা মনিপুরদা লাক্কনি হায়বগী ওফিসিয়েল ইনফোর্মেসন লৈত্রি,অথূবা মতমদা পোপ্যুলর লৈঙাক অমা লাক্লগনি থাজবা লৈ: এন বিরেন

মনিপুরদা হৌজিক থোক্লিবা হীঙশাগী ঈরাং অসী হৌখিবা থা ৭/৮ লোমগী মতমসিদা তপ্না-তপ্না শান্তি হঞ্জিল্লকপা উরি। প্রসিদেন্ট রুল মনিপুরদা লৈজরবসু ওইরক্লিবা গ্ৰাউন্দ সিচ্যুয়েসন অসী য়েংলগা সেন্টরগী মায়কৈদগী মনিপুরদা পোপ্যুলর লৈঙাক অমা অথূবা মতমদা শেম্লক্কনি হায়বগী থাজবা চাউনা লৈরি হায়না মনিপুরগী হান্নগী চিফ মিনিষ্টর নোংথোম্বম বিরেন্না ফোঙদোকখ্রে। বি জে পি অসী য়াম্না থকশী-খাশি ঙাক্না চৎপা, নিয়ম-নিতি, চৎনা-পথাপ কায়হন্দনা থবক তৌবা নেস্নেল পোলিটিকেল পার্টি অমা ওইবনা ঐখোয়না শ্বায়দা তৌবা য়াবা অমসুং তৌবা য়াদবা থৌওং কয়া লৈরি।

থবক অমা পাঙথোক্নিংই হায়দুনা সেন্টরগী হায় কম্মান্দগী অয়াবা হান্না য়াওদনা হেক্তা পাঙথোকপা য়াদে। বি জে পিনা কনাগুম্বা পোলিটিকেল পার্টি অমত্তদা ক্রিটিসাইজ তৌবগী ৱাফমসু লৈতে। হৌজিক ষ্টেট অসীদা মায়োক্নরিবা খুদোংচাদবা অমসুং মীয়াম্না থেংনরিবা অৱাবশিং অসী য়াম্না থুনা লোইশিন্ননবা বি জে পিনা হোৎনরি হায়খি। মনিপুরদা পোপ্যুলর লৈঙাক অমা অথূবা মতমদা শেম্লক্কনি হায়বগী অচেৎপা থাজবা লৈরি। হীরম অসীগী মতাংদা পার্টি অসীগী এম এল এ শিংনা মরী লৈনবা সেন্টরগী লুচিংবশিংগা মীকূপ খূদীং পাউ ফাওনরি হায়খি। য়ুনিয়ন হোম মিনিষ্টর আমিট শাহানা কন্না হোৎনবদগী মনিপুরদা হৌজিক শান্তি তপ্না- তপ্না হঞ্জিল্লকপা উরি হায়খি।

অদুঙৈ কুমশিং ১৯৭৫ দা মতমদুগী নহা ওইরিবা, ঙসীনা ইন্দিয়াগী প্রাইম মিনিষ্টর ওইরবা, নরেন্দ্র মোদিনা ইমর্জেন্সি মতমদুদা পীখিবা কন্ট্রিব্যুসন কয়াগী মরমদা ইবা, “দি ইমর্জেন্সি দাইরি”, ফোঙখিবা থৌরমদা এন বিরেন্না ৱাফমশিং অসী থা অসীগী ২৮ দা ইম্ফালগী থম্বাল শঙলেন্দা ফোঙদোকখিবনি।