কুকি – জো কাঙলূপকী মায়কৈদগী ঙসীফাওবা দিমান্দ তৌদুনা লাক্লিবা সেপরেট এদমিনিষ্ট্রেসন গী ৱাফমদা পোলিটিকেল সোল্যুসন অমা মপূঙ ফানা পুরক্ট্রিঙৈ চৈরকশিদা বফর জোনশিং লান্সীল্লকপা য়াখিরোই। চুরাচান্দপুর, কাংপোকপি, মোরেনচিংবদা মৈতৈ ফূরূপকি মীওই চঙবদা অথীংবা থম্লিবসি মখাতানা চৎনখিগনি।
পোলিটিকেল সোল্যুসন পুরক্ট্রিফাওবা বফর জোনশিং গী কাঙলোন ঙাক্কদবনি, ইকায় খুম্নগদবনি হায়না ইন্দিজিনস ট্রাইভেল লিদর্স ফোরম (আই টি এল এফ) না চেরোল অমদা ফোঙদোরক্লি। চেরোল অদূদা মখা তারক্লিবা ৱাফমদি, লাক্লিবা মে অহূমদা ৱাল ওফ রেমেমব্রেন্স তা সেপরেসন ডেগী থৌরম পাঙথোক্নবা শেম-শাবা পূম্লোই লোইরে।
হন্দক্কি ঈরাং অসীদা কুকিলেন্দগীদাবী তকশীনবদা থৱায়না পোন্থা পীখ্রবা অথৌবা-অথৌবীশিংদা ঈকায়খুম্নবা ঊত্তুনা থৌরম অসী পাঙথোক্কদবনি।আই টি এল এফ কি ৱিমেন ৱিংনা, থৌরম অসী মপূঙ ফানা পাঙথোক্নবগীদমক মথৌ তাবা ফন্দগী শেমফমশিং মীয়ামদগী খায়গৎনবা থৌরাং তৌরি। মীয়াম্না মতেঙ পাংবিয়ু হায়বা ৱাফম অমসু আই টি এল এফ না মরী লৈনবশিংদা থম্লক্লি।