ওপ্পোজিসন্না রুলিংবু হুন্দুনা লৈরি, রুলিংনা মপূ নীঙদুনা লৈরে, কনানা হীংশা অসীগী সোল্যুসন পুরক্কদৌরি : মাহেশ্বর

ওপ্পোজিসন পার্টিশিংনা মনিপুরগী হীংশা অসীগী মতাঙদা ওইথোকপা য়াগদবা সজেসন পীদুনা সোল্যুসন পুরক্ননবা লম্বী য়াত্তুনা মীয়ামগী মহৌশাগী পুন্সিদা হঞ্জিন্ননবা থৌরাংশিং লৌখৎপগী মহুত্তা খুদোংচাবা লৌদুনা রুলিং পার্টিবু হুন্দুনা লৈবগী হৈনবি অমা লৈরি । অদুগা রুলিং পার্টিগী লুচিংবনি হায়রিবশিং অসীসু দিল্লিদা ফম্লিবা মখোয়গী মবূঙোশিং অদুনবু হায়রবদি লানগেরা চুমগেরা মদূ ইন্দবা য়াদবনি, ঙাক্না চৎকদবনি হায়বা অমা চেৎনা থাজবগা লোয়ননা থবক তৌদুনা লৈরি। অসীগুম্বা ফীভম অসীদা হৌজিক থোক্লিবা হীংশাগী ঈরাং অসী মতৌ করম্না ৱারোয়শিন পুরকপা য়াগদৌরিবনো হায়না রিপব্লিকান পার্টি ওফ ইন্দিয়া (আর পি আই) অথৱালেগী নেস্নেল জেনরেল সেক্রেটরি ওইনা লৈরিবা থৌনাউজম মাহেশ্বরনা পেন্দবা ৱাফম ফোঙদোকখ্রে।

মহাক্কি ফেসবুক পেজদা মাহেশ্বর না ৱাফম অসী ফোঙদোরকখিবনি। মনিপুরদা কুকি- মিলিটেন্টশিংনা মৈতৈগী মথক্তা লান্দারকপগী থৌওংশিং অসী চহী অমগা মখায় ফাজিল্লক্লে। সেন্টর অমসুং ষ্টেট লৈঙাক অনীমক্না মসীগী মতাংদা চপ চাবা সোল্যুসন অমত্তা পুরকপা ঙমদনা লৈরি। কুকি- মিলিটেন্টশিংনা চত্থরক্লিবা লান অসী চৎলিবা সেপ্তেম্বর থা অসীগী অমদগী অনৌবা হায় টেক দ্রোণ বোম্বিং এত্তেক, স্নাইপর এত্তেক, রোকেট প্রোপেল্ড বোম্বিং এত্তেক কয়া চত্থরকপদগী অনৌবা মায়োন অমদা লাকখ্রে হায়না মহাক্না থমখি।

ফিভম অসী মপান লৈবাক্কি খূৎ য়াওশীল্লক্লে তাকপনি। এক্সটর্নেল এগ্ৰেসন চত্থরক্তুনা ইন্দিয়াগী সোভরেন্টি, ইন্টিগ্ৰিটি, সেক্যুরিটি অমসুং নেস্নেল ইন্টিগ্ৰেসন্দা অকায়বা অমদি অকিবা পীরক্লবফাওবদা ইন্দিয়া লৈঙাক্না য়েংদুনা লৈরিবা অসীদি তশেংনমক মনিপুর অসী মচেৎ তানা থুগাইনবা ইন্দিয়াগী খূজীন থৌরাংনি হায়বসি ময়েক শেংলে হায়না মহাক্না ফোঙদোকখি।