নূপী দাক্তর অমা লৈখিদবগী মায়োক্তা দাক্তর অমদি মেদিকেল ষ্টাফশিংনা অকনবা প্রোটেষ্ট তৌদুনা খোঙজঙ চঙশীনখ্রে

কোলকট্টাদা বেজ তৌবা আর জি কর মেদিকেল কোল্লেজদা রেসিদেন্ট দাক্তর নূপী অমবু মশাগী ঈকায়খুম্নবা মাঙহনবিরবা মতূং য়াম্না তমথিবা মওংদা হাৎখিবা থৌওং অদুবু পেন্দবা ফোঙদোক্তুনা ইন্দিয়ান মেদিকেল এসোসিয়েসন জুনিয়র দাক্তর্স নেটৱার্ক না লৈবাক শীন্থুংনা চত্থরক্লিবা হঙ্গর ষ্ট্রাইক ঙসীগা থারগা নুমিৎ তরাহুমদোই শুরে। অসীগুম্বা থম্মোয় শোকপা দাক্তরশিংগী খোঙজঙ অসিদা সোলিদারিটি উত্তুনা অমসুং মপূংফানা শৌগৎপা ঊৎলদুনা মনিপুরদসু তোঙান তোঙানবা মেদিকেল কোল্লেজশিং অমসুং হোস্পিটালশিংদা দাক্তরশিং, মেদিকেল মহৈরোয়শিং অমসুং মরী লৈনবা ষ্টাফশিংনা অকনবা প্রোটেষ্ট তৌদুনা খোঙজঙ চঙশীনখ্রে।

জেনিমস হোস্পিটালদা ইন্দিয়ান মেদিকেল এসোসিয়েসন গী মখাদা লৈরিবা মেদিকেল ষ্টুদেন্স নেটৱার্ক মনিপুর ষ্টেট ব্রাঞ্চকি ষ্টেট কনভিনর নিংথৌজম দিনেশনা খোঙজং অদুদা শরুক য়ারদুনা ফোঙদোকখিবা মতূং ইন্না, কোলকট্টাগী মেদিকেল কোল্লেজ অদুগী দাক্তরশিংনা, রেসিদেন্ট দাক্তর নূপী অমবু মীওই খরনা লৌতূনদুনা তমথীনা শরাক তম্বিরবা মতূং য়াম্না তমথিবা মওংদা হাৎখিবা থৌওং অদুবু পেন্দবা ফোঙদোক্তুনা শিদ্রিফাওবা চরা হেনবগী খোঙজং অমা, দিমান্দশিং ফংদ্রিফাওবা চঙশীল্লকপা নুমিৎ ১৩ নি শুরে। কা হেন্না ফীভম শোক্ল বা দাক্তর ৭ হৌজিক ইন্টেন্সিব ক্যের য়ুনিটশিংদা থমদুনা লায়কন্নরগা লৈরি অদুগা দাক্তর নূপী অমগা অতোপ্পা দাক্তর নূপা অমগনা কা হেন্না মশা শোকথরকপদগী ক্রিটিকেল ক্যের য়ুনিটশিংদা লায়কন্নরগা লৈরি হায়খি।

রিমসকি ও পি দি ব্লোক মমাঙদসু মেদিকেল ওফিসারশিং য়াওনা মহৈরোয়শিং শরুক য়াদুনা খোঙজঙ চঙশীনখি লোয়ননা শিজা একাদেমি ওফ হেল্থ সাইন্সেস তসু দাক্তরশিং অমসুং অতৈ ষ্টাফশিংনা অকনবা প্রোটেষ্ট তৌদুনা খোঙজঙ চঙশীনখি।