নাগা কুকি অনীগী উংখৎনবা হেঙ্গৎলক্লে, নাকল অনীগী মীওই অহূম শোক্লে, লাইসেন্স নোংমৈ পীখৎলক্নবা ওর্দর থোকখ্রে

ঊখ্রূল দিষ্ট্রিক্টকি লীতান পুলিস ষ্টেসন্না কোনবা সিনাকৈথৈ ভিল্লেজ এরিয়াদা কুকি খূৎলায় পায়বা মিলিটেন্টশিং অমসুং তাঙ্খুল ভল্লন্টিয়রশিংগী মরক্তা হন্দক য়াম্না কন্না মূক্নরকখিবা মতূঙ কাঙলূপ অনীমক্কি মীয়াম মরক্তা অকনবা মওংদা খৎন-চৈনবগী থৌদোক থোকখিবা অদূ লোইবা নাইদনা ঙসীসু মখা শমথরক্তুনা কামজোং দিষ্ট্রিক্ট য়ৌনা ঈরাং শন্দোরক্লে।
ঙরাং অয়ূক পূং ৭.৩০ রোম তারকপা মতমদগী লেপ্পা লৈতনা কুকি খূৎলায় পায়বশিং অমসুং তাঙ্খুল ভল্লন্টিয়রশিংগী মরক্তা অকনবা মওংদা নোংমৈ কাপ্নখিবা থৌদোক্তা তাঙ্খুল কাঙলূপকি নহা অনী অমসুং কুকি কাঙলূপকি নহা অমা নোংমৈনা পান্দুনা শোকখ্রে । নোংমৈনা পান্দুনা শোক্লবা তাঙ্খুল কম্যুনিটিগী নহা অনীদু ঊখ্রূল দিষ্ট্রিক্ট হোস্পিটালদা পুখৎলক্তুনা লায়েংলি হায়রি।
মফম অদুদগী ফংবা ছোর্স মতূঙ ইন্না, কামজোং দিষ্ট্রিক্ট কি সরকাফূং ভিল্লেজগী অকো‌য়বদা কুকি খূৎলায় পায়বশিং অমসুং তাঙ্খুল ভল্লন্টিয়রশিংগী মরক্তা অকনবা মওংদা নোংমৈ কাপ্নখিবা অদূদা নহা অনীদু নোংমৈনা পান্দুনা শোকপদগী হোস্পিটালদা লায়কন্নখিবনি।শোক্লবা মীওই অনীমক সরকাফুং ভিল্লেজদগীনি অদূগা মখোয় অনীমক মখোঙদা নোংমৈনা পানবদগী শোকখিবনি।মখোয় অনীদূ রিংরূই রামরুর (৪১) অমসুং রাইচান লুংলেন (২৪) কৌই হায়রি।
শোক্লবা কুকিগী নহা অদুনা জোনি খোঙসাই কৌই।মহাক্কি লেংজুমদা বোম মচেৎনা পানখিবনি। মহাকসু সাইকুল কম্যুনিটি হেল্থ সেন্টরদা পুরক্লগা লায়কন্নরি হায়রি।
নাকল অমরোমদা, কামজোংগী দিষ্ট্রিক্ট মেজিষ্ট্রেট এল এন কাসুংনা ঙরাং ওর্দর অমা খূদক্তা থোক্তুনা দিষ্ট্রিক্ট অসিগী মনূঙদা লৈরিবা লাইসেন্স কি নোংমৈ খূদীঙমক খ্বাইদগী অথুবা মতমদা চসাদ পুলিস ষ্টেসন্দা হাংদোক্লিবা কল্লেক্সন সেন্টরদা পীশীল্লক্নবা খঙহনখ্রে।